وزیراعظم کی چھوٹے کاروبار کیلئے قرض کی رقم 5 سے بڑھاکر 15 لاکھ کرنے کی ہدایت
وزیراعظم شہباز شریف نے چھوٹے اور درمیانے درجے کے کاروبار (ایس ایم ایز) کے لیے ’پرائم منسٹر یوتھ پروگرام‘ کے تحت قرض کی رقم کو 5 لاکھ سے بڑھا کر 15 لاکھ کرنے کی ہدایت کر دی۔
ڈان نیوز کے مطابق اسلام آباد میں وزیر اعظم شہباز شریف کی زیر صدارت چھوٹے اور درمیانے درجے کے کاروبار کے امور پر جائزہ اجلاس منعقد ہوا ۔
وزیراعظم نے ملک بھر میں چھوٹے اور درمیانے درجے کے کاروبار کو سہولتوں کی فراہمی کے لیے ان کا تفصیلی سروے جلد مکمل کرنے کی ہدایت کی۔
انہوں نے حکم دیا کہ چھوٹے اور درمیانے درجے کے کاروبار کو دی جانے والی سہولتوں کو بین الاقوامی تقاضوں سے ہم آہنگ کرنے کے لیے ترقی یافتہ ممالک کے ماڈلز کا اطلاق یقینی بنایا جائے۔
شہباز شریف نے ہدایت کی کہ چھوٹے پیمانے کے کاروبار میں خواتین انٹر پرینیورز کے لیے خصوصی پیکیج بناکر جلد پیش کیا جائے، حکومت پاکستان کی افرادی قوت کو کاروبار کی ترغیب دینے کے لیے چھوٹے اور درمیانے درجے کے کاروبار کو سہولت دینے کے لیے پر عزم ہے۔
انہوں نے کہا کہ دنیا بھر میں ایس ایم ایز معیشت کی ترقی میں کلیدی اہمیت رکھتی ہیں، حکومت کی اولین ترجیح ہے کہ ایس ایم ایز کو فروغ دے تاکہ ملکی برآمدات میں اضافہ ہو۔
وزیرِ اعظم شہباز شریف کی زیر صدارت اجلاس کو بریفنگ میں ایس ایم ایز کی ترقی و سہولت کے لیے حکومتی اقدامات پر پیش رفت سے آگاہ کیا گیا۔
اجلاس کو بتایا گیا کہ وزیرِ اعظم کی ہدایت پر عمل درآمد کرتے ہوئے تمام اسٹیک ہولڈرز کو اعتماد میں لینے کے بعد ایس ایم ایز کے لیے قرض کے فارم کو مزید آسان اور سادہ بنا دیا گیا ہے، تاکہ زیادہ سے زیادہ ایس ایم ایز اپنے کاروبار کی بہتری کے لیے قرض کی سہولت سے مستفید ہو سکیں۔