کراچی میں ٹینکر کی ٹکر سے ایک اور موٹرسائیکل سوار جاں بحق
کراچی کے علاقے منگھوپیر کے قریب ٹینکرز کی ٹکر سے ایک موٹرسائیکل سوار جاں بحق ہوگیا، واقعے میں ملوث ڈرائیور فرار ہوگیا، مشتعل افراد نے سڑک بلاک کردی۔
ڈان نیوز کے مطابق ریسکیو حکام کا کہنا ہے کہ منگھوپیر کے علاقے میں تیز رفتار ٹینکر کی ٹکر سے موٹرسائیکل سوار جاں بحق ہوگیا، متوفی کی لاش کو عباسی اسپتال منتقل کردیا گیا۔
جاں بحق ہونے والے موٹرسائیکل سوار کی شناخت محمد دانیال کے نام سے کی گئی ہے، حادثے کے بعد مشتعل افراد نے منگھوپیر کی سڑک بلاک کردی واٹر ٹینکر ڈرائیور موقع سے فرار ہوگیا۔
کراچی میں ٹریفک حادثات میں شہریوں کی اموات کا سلسلہ جاری ہے، فروری کے 10 روز کے دوران شہر میں مختلف ٹریفک حادثات میں 22 شہری جانیں گنوا بیٹھے۔
ڈان نیوز کے مطابق یکم فروری کو بلدیہ اتحاد ٹاؤن میں تیز رفتار کوچ کی ٹکر سے 12 سالہ لڑکا جان سے گیا، یکم فروری کو ہی بھینس کالونی روڈ پر ٹریفک حادثے میں 15 ماہ کا بچہ جاں بحق اور ماں زخمی ہوگئی۔
2 فروری کو نیشنل ہائی وے لنک روڈ پر 2 گاڑیوں میں تصادم کے نتیجے میں 2 افراد جاں بحق اور 5 زخمی ہوئے، اسی روز عوامی مرکز کے قریب نامعلوم گاڑی کی ٹکر سے موٹرسائیکل سوار جاں بحق ہوگیا۔
5 فروری کو راشد منہاس روڈ پر ڈمپر کی ٹکر سے خاتون سمیت 3 افراد کی جانیں گئیں جبکہ دیگر ٹریفک حادثات میں مزید 3 افراد جاں بحق اور 7 زخمی ہوئے۔
6 فروری کو ملیر ہالٹ نیشنل ہائی وے پر ڈمپر کی ٹکر سے موٹرسائیکل سوار باپ بیٹا جاں بحق ہوگئے جبکہ ماں زخمی ہوئی، 7 فروری کو بھی تیز رفتار ٹینکر کی ٹکر اور دیگر ٹریفک حادثات میں 3 افراد کی جانیں گئیں۔
گزشتہ روز 8 فروری کو کورنگی ابراہیم حیدری پر رانگ وے آنے والے ڈمپر نے موٹر سائیکل پر سوار 3 افراد کو کچل دیا، تینوں نوجوان موقع پر جاں بحق ہوگئے جبکہ اسٹیل ٹاؤن میں ڈمپر کی ٹکر سے ایک شہری جاں بحق اور ایک زخمی ہوا۔
گزشتہ رات شاہ لطیف ٹاؤن میں ایک اور تیز رفتار ڈمپر نے موٹر سائیکل سوار بہن بھائی کو ٹکر مار دی، حادثے میں موٹر سائیکل سوار بھائی جاں بحق اور اس کی بہن شدید زخمی ہو گئی۔
دریں اثنا، رواں سال کے 40 دنوں میں ٹریفک حادثات کے دوران 99 افراد جاں بحق ہوچکے ہیں۔
واضح رہے کہ کراچی میں ممنوع اوقات کار میں ڈمپرز، واٹر ٹینکرز، ٹرالرز، باؤذر کے سڑکوں پر چلنے کے خلاف ٹریفک پولیس کی جانب سے مؤثر کارروائیاں نہ ہونے پر آج شہری احتجاج کرتے ہوئے خود سڑکوں پر نکل آئے تھے۔
ڈان نیوز کے مطابق ناگن چورنگی پر شہریوں نے واٹر ٹینکرز کو روک کر از خود کاغذات اور ڈرائیونگ لائسنس کی جانچ شروع کردی۔
ہیوی ٹریفک کی جانب سے سرکاری اوقات کار کی خلاف ورزی پر شہریوں نے احتجاج کیا اور سڑک سے گزرنے والے واٹر ٹینکرز کو روک لیا، موقع پر موجود لوگوں نے واٹر ٹینکرز کی چابیاں نکال لیں اور ہیوی گاڑیاں ٹریفک پولیس کو دینے سے بھی انکار کردیا۔
شہریوں نے ازخود ہی ڈرائیورز سے ٹینکرز کے کاغذات اور ڈرائیونگ لائسنس طلب کرکے جانچ شروع کردی، عوام نے لائسنس کے بغیر ہیوی گاڑیاں چلانے والے ڈرائیورز اور ٹینکرز کے خلاف سڑکوں پر ہی ایف آئی آرز درج کرنے کا مطالبہ کردیا۔
ایک شہری نے خود ٹینکر چلاکر سڑک کے ایک جانب کھڑا کر دیا، عوام کی جانب سے ٹریفک پولیس پر رشوت لے کر ہیوی ٹریفک شہر میں چھوڑنے کے الزامات لگائے گئے اور شور شرابا بھی کیا گیا۔