کراچی: ناظم آباد میں کار سوار کو زخمی کرنے والا ڈمپر شہریوں کو کچلنے کی کوشش کرکے فرار
کراچی میں عوام کے غم و غصے کے باوجود ڈمپرز اور ہیوی ٹریفک کے ذریعے ہونے والے حادثات تھم نہ سکے، ناظم آباد میں ڈمپر کی ٹکر سے کار سوار شہری زخمی ہوگیا۔
ڈان نیوز کے مطابق ناظم آباد ایک نمبر میں ڈمپر کی ٹکر سے کار سوار زخمی ہوگیا، جس کے بعد شہریوں نے ڈمپر کا گھیراؤ کرلیا، تاہم ڈرائیور نے شہریوں پر ہی ڈمپر چڑھانے کی کوشش کی جس کے بعد وہاں موجود افراد مشتعل ہوگئے، تاہم ڈرائیور ڈمپر لے کر فرار ہوگیا۔
خوش قسمتی سے اس واقعے میں کوئی جانی نقصان نہیں ہوا، ورنہ ڈرائیور نے شہریوں کو کچلنے میں کوئی کسر نہیں چھوڑی تھی۔
واضح رہے کہ گزشتہ ڈیڑھ ماہ میں تواتر کے ساتھ ہیوی ٹریفک کے ذریعے حادثات میں اضافہ دیکھا جارہا ہے، جن میں درجنوں افراد جاں بحق ہوچکے ہیں۔
ہیوی ٹریفک کی جانب سے ممنوع اوقات کار میں شہر میں تیز رفتاری کی وجہ سے حادثات کے واقعات پر جماعت اسلامی، ایم کیو ایم پاکستان، مرکزی مسلم لیگ، مہاجر قومی مومنٹ سمیت دیگر سیاسی جماعتوں نے حکومت سے ان واقعات کا سختی سے نوٹس لینے کا مطالبہ کرتے ہوئے سخت اقدامات کرنے کا مطالبہ کیا تھا۔
سندھ حکومت نے ہیوی ٹریفک کے اوات کار کی پابندی کو مزید سخت کرنے کی ہدایات بھی جاری کیں، گزشتہ روز ہیوی ٹریفک کی گاڑیوں کے جگہ جگہ چالان کیے جاتے رہے لیکن اس کے باوجود بھی حادثات کا سلسلہ تھمنے کا نام نہیں لے رہا۔
ہیوی ٹریفک کے بڑھتے ہوئے حادثات اور شہریوں کی ہلاکتوں کے معاملے پر بیرسٹر حسن خان نے ہیوی ٹریفک کے شہر میں داخلے کے خلاف سندھ ہائی کورٹ سے رجوع کرلیا۔
ڈان نیوز کے مطابق درخواست میں چیف سیکریٹری، آئی جی سندھ، ڈی آئی جی ٹریفک سمیت دیگر کو فریق بنایا گیا ہے، پٹیشن میں کہا گیا ہے کہ رواں ماہ ہیوی ٹریفک سے حادثات میں 74 افراد ہلاک ہوچکے ہیں۔
بیرسٹر حسن خان کی جانب سے سندھ ہائی کورٹ میں دائر کی گئی درخواست میں چیف سیکریٹری، آئی جی سندھ ڈی آئی جی ٹریفک سمیت دیگر کو فریق بناتے ہوئے موقف اختیار کیا گیا ہے کہ روزانہ کی بنیاد پر ڈمپرز لوگوں کو کچل رہے ہیں، شہر میں ڈمپرز، آئل ٹینکرز سمیت ہیوی ٹریفک رش کے اوقات میں چل رہا ہے۔