کراچی کی سینٹرل جیل کمپلیکس میں قائم جوڈیشل مجسٹریٹ جنوبی کی عدالت میں غیر قانونی اسلحہ اور منشیات برآمدگی کے مقدمے میں جیل حکام نے ملزم ارمغان کے والد کامران قریشی کو پیش کردیا۔

ڈان نیوز کے مطابق عدالت نے تفتیشی افسر کی عدم حاضری پر برہمی کا اظہار کرتے ہوئے تفتیشی افسر کو شوکاز نوٹس جاری کر دیے۔

ملزم کامران قریشی کے خلاف غیر قانونی اسلحہ اور منشیات برآمدگی کے مقدمے کی سماعت ہوئی، اس دوران تفتیشی افسر عدالت میں موجود نہیں تھے جس پر عدالت نے برہمی کا اظہار کیا۔

مزید کے لیے کلک کریں

فاضل جج نے کہا کہ اب تک کیس کا چالان عدالت میں پیش نہیں کیا جاسکا ہے، عدالت نے تفتیشی افسر کو شوکاز نوٹس جاری کر دیے۔

وکیل خرم عباس نے عدالت کو بتایا کہ ملزم کامران قریشی کی گرفتاری 20 مارچ کو ظاہر کی گئی تھی، جب کہ اسے 18 مارچ کو گھر کے باہر سے گرفتار کیا گیا تھا۔

وکیل خرم عباس نے کہا کہ مجھے ایف آئی اے حکام کی جانب سے دھمکیاں دی جارہی ہیں، مجھ سے میرے موکل سے متعلق معلومات حاصل کرنے کی کوشش کی جارہی ہے۔

بعد ازاں عدالت نے درخواست کی سماعت 16 اپریل تک ملتوی کر دی۔

ارمغان کےخلاف کیس میں ضامن سے متعلق رپورٹ طلب

کراچی کی اینٹی نارکوٹکس عدالت نے مصطفیٰ عامر قتل کیس کے ملزم ارمغان کے خلاف منشیات کی اسمگلنگ کیس میں تفتیشی افسر سے ملزم کے ضامن کے بارے میں رپورٹ طلب کرتے ہوئے ملزم ارمغان کو عدالت میں پیش کرنے کا حکم جاری کردیا۔

کراچی کی اینٹی نارکوٹکس کورٹ میں مصطفیٰ عامرقتل کیس کےملزم ارمغان کےخلاف منشیات کی اسمگلنگ کے کیس کی سماعت ہوئی۔

عدالت کو بتایا گیا کہ ملزم ارمغان کی والدہ سارہ ملزم کی ضامن ہے، عدالت نے ملزم کی عدم پیشی پر عدالت نے ضامن کو طلب کرنے کے نوٹس جاری کیے تھے۔ ملزم کےخلاف 2019 سے منشیات کی اسمگلنگ کےمقدمات زیر سماعت ہیں۔