نجکاری کمیشن اجلاس: 3 ڈسکوز میں نجی شعبے کی شمولیت کیلئے ٹرانزیکشن کمیٹی تشکیل دینے کی منظوری
نجکاری کمیشن بورڈ نے بجلی کی 3 تقسیم کار کمپنیوں (ڈسکوز) میں نجی شعبے کی شمولیت کے لیے ایک ٹرانزیکشن کمیٹی تشکیل دینے کی منظوری دے دی۔
وزارت نجکاری کی جانب سے جاری اعلامیے کے مطابق نجکاری کمیشن بورڈ کا 233 واں اجلاس وزیراعظم کے مشیر برائے نجکاری اور نجکاری کمیشن کے چیئرمین محمد علی کی صدارت میں ہوا۔
اعلامیے میں کہا گیا ہے کہ بورڈ نے تین ڈسکوز یعنی فیسکو، گیپکو اور آئیسکو میں نجی شعبے کی شراکت کے لیے جاری عمل کے لیے ایک ٹرانزیکشن کمیٹی کی منظوری بھی دی۔
اعلامیے کے مطابق بورڈ نے روزویلٹ ہوٹل کارپوریشن، نیویارک کی نجکاری کے لیے مالیاتی مشیر، جے ایل ایل کی قیادت میں قائم کنسورشیم کے تیار کردہ لین دین کے اسٹرکچرز پر بھی تبادلہ خیال کیا۔
نجکاری کمیشن نے کابینہ کمیٹی برائے نجکاری کو پیش کرنے کے لیے لین دین کے اسٹرکچرز سے متعلق اپنی سفارشات کو حتمی شکل دی۔
اعلامیے کے مطابق بورڈ نے زرعی ترقیاتی بینک لمیٹڈ (زیڈ ٹی بی ایل)کی نجکاری کے لیے فنانشل ایڈوائزر کی تقرری کے بولی کے عمل کوبولیوں کے زیادہ ہونے کے باعث منسوخ کرنے کا فیصلہ کیا اور فنانشل ایڈوائزر کی خدمات حاصل کرنے کے لیے دوبارہ اشتہار دینے کی ہدایت کی۔