راولپنڈی پولیس نے خواتین کو استعمال کرکے شہریوں کو ہنی ٹریپ کرکے لوٹ مار کرنے والے گینگز کے خلاف کارروائیاں کرتے ہوئے خواتین اور پولیس اہلکاروں سمیت 2 خطرناک گروہوں کو گرفتار کرلیا۔

ڈان نیوز کے مطابق ترجمان راولپنڈی پولیس نے بتایا کہ مجموعی طور پر شہریوں کو ہنی ٹریپ کرکے لوٹنے میں ملوث 16 ملزمان کی گرفتاری دوران ان سے نقدی اور اسلحہ بھی ملا۔

صدر بیرونی پولیس نے کارروائی کرتے ہوئے پاکستانی نژاد مشرقی افریقی خاتون اور اس کے شوہر سمیت 6 افراد کو گرفتار کیا، گینگ کے قبضے سے 2 لاکھ 50 ہزار روپے اور اسلحہ برآمد ہوا۔

مزید کے لیے کلک کریں

پولیس کے مطابق ہنی ٹریپ کے ذریعے سرکاری ملازمین، نوجوانوں اور بزرگوں کو لوٹنے والے تابی اور مرینہ نامی خواتین ملزمان سوشل میڈیا پر شہریوں سے رابطہ کرکے انہیں ملاقات کے بہانے بلا کر گینگ کے دیگر ارکان کے ساتھ مل کر لوٹ لیتی تھیں۔

صادق آباد پولیس نے آفتاب عرف تابی گینگ کے 10 ارکان کو گرفتار کیا، جن میں خواتین اور پولیس اہلکار بھی شامل ہیں، گینگ کے قبضے سے 5 لاکھ روپے اور اسلحہ برآمد ہوا۔

گرفتار پولیس اہلکاروں میں ہیڈ کانسٹیبل فضل عباس، رضا عباس، کانسٹیبل مبشر انصر، افضال اور نعمان شامل ہیں۔

ملزمان شہریوں کو بلیک میل کر کے نازیبا ویڈیوز اور تصاویر کے ذریعے رقم بٹورتے تھے۔