وزیراعلیٰ خیبر پختونخوا کا 36 ارب روپے کے مبینہ کرپشن اسکینڈل کی تحقیقات کا حکم
خیبرپختونخوا کے ضلع کوہستان میں ترقیاتی منصوبوں کی رقم نجی بینک اکاونٹس میں منتقل کیے جانے کے انکشاف کے بعد وزیراعلیٰ خیبر پختونخوا علی امین گنڈاپور نے 36 ارب کے مبینہ کرپشن اسکینڈل کی تحقیقات کا حکم دے دیا۔
ڈان نیوز کے مطابق خیبر پختونخوا میں 36 ارب کے مبینہ کرپشن اسکینڈل کا انکشاف ہونے کے بعد وزیراعلیٰ علی امین گنڈاپور نے تحقیقات کی ہدایت جاری کردی۔
نیب ذرائع کے مطابق ضلع کوہستان میں ترقیاتی منصوبوں کی رقم نجی بینک اکاؤنٹس میں منتقل کی گئی جبکہ ڈمپر ڈرائیور کے بینک اکاؤنٹ میں بھی 3 ارب روپے کی موجودگی کا انکشاف ہوا ہے جس پر اس کا اکاؤنٹ منجمد کردیا گیا ہے۔
نیب ذرائع کا کہنا ہے کہ اسکینڈل میں سیاسی شخصیات، اعلیٰ افسران اور ضلعی سی اینڈ ڈبلیو اہلکاروں کے ملوث ہونےکا انکشاف ہوا ہے۔
نیب ذرائع کے مطابق 2018 سے 2024 تک ترقیاتی منصوبوں کی رقم نجی بینک اکاؤنٹس کے ذریعےنکالی گئی۔
اسپیکر خیبرپختونخوا اسمبلی نے مالیاتی اسکینڈل سامنے آنے کے بعد پبلک اکاؤنٹس کمیٹی کا اجلاس طلب کرلیا ہے، محکمہ خزانہ خیبرپختونخوا کا کہنا ہے کہ ٹھیکیداروں کی سیکیورٹی رقم سے محکمہ خزانہ کا کوئی واسطہ نہیں ہے۔