افغانستان میں پاکستانی ناظم الامور کو سفیر کا درجہ دے دیا گیا
وزیرخارجہ اسحٰق ڈار نے کہا ہے کہ کابل میں اپنے ناظم الامور کا درجہ بڑھا کر سفیر کی سطح پر کیا جا رہا ہے، اس اقدام سے دونوں برادر ممالک کے درمیان تعلقات کو فروغ ملے گا۔
وزیرخارجہ اسحٰق ڈار نے ایک بیان میں کہا ہے کہ 19 اپریل 2025 کو پاکستانی وفد کے ہمراہ میرے کابل کے انتہائی نتیجہ خیز دورے کے بعد پاک-افغان تعلقات ایک مثبت سمت میں گامزن ہیں۔
انہوں نے کہا کہ اس رفتار کو برقرار رکھنے کے لیے، مجھے حکومت پاکستان کے اس فیصلے کا اعلان کرتے ہوئے خوشی محسوس ہو رہی ہے کہ کابل میں اپنے ناظم الامور (چارج ڈی افیئرز ) کا درجہ بڑھا کر سفیر کی سطح پر کیا جا رہا ہے۔
وزیرخارجہ اسحٰق ڈار نے کہا کہ مجھے یقین ہے کہ یہ اقدام دونوں برادر ممالک کے درمیان تعلقات کو مزید فروغ دینے، اقتصادی، سلامتی، انسداد دہشت گردی اور تجارت کے شعبوں میں پاک-افغان تعاون کو مزید گہرا کرنے اور باہمی تبادلوں کو بڑھانے میں مزید معاون ثابت ہوگا۔