جی ایچ کیو حملہ کیس میں عدالت نے ایس ایس پی انویسٹی گیشنز کے پیش نہ ہونے پر عدالت نے برہمی کا اظہار کرتے ہوئے ایس ایس پی کو شوکاز نوٹس جاری کردیا۔

ڈان نیوز کے مطابق اڈیالہ جیل میں 9 مئی سے متعلق جی ایچ کیو گیٹ حملہ کیس کی سماعت ہوئی۔

دوران سماعت طلبی کے باوجود ایس ایس پی انویسٹی گیشنز پیش نہ ہوئے جس پر عدالت نے نوٹس جاری کرتے ہوئے برہمی کا اظہار کیا۔

عدالت کی جانب سے جاری کیے گئے شوکاز نوٹس میں کہا گیا کہ طلبی کے باوجود پیش نہ ہونا واضح طور پر عدالتی احکامات کی خلاف ورزی ہے جب کہ عدالتی حکم کے باوجود آپ نے 2 یو ایس بیز پیش نہیں کیں۔

مزید کے لیے کلک کریں

نوٹس میں مزید کہا گیا کہ یہ طرز عمل عدالتی کارروائی میں رکاوٹ ڈال کر فیصلہ میں تاخیر کرنے کے مترادف اور سپریم کورٹ کے احکامات کی بھی خلاف ورزی ہے۔

عدالت نے قرار دیا کہ کیوں نہ آپ کے خلاف اے ٹی اے کی دفاعی 37کے تحت کارروائی کی جائے۔

عدالت کی جانب سے ایس ایس پی انویسٹی گیشن کو 11جون کو عدالت پیش ہو کر عدم حاضری کی وضاحت کرنے کے احکامات جاری کردیے گئے۔

پس منظر

واضح رہے کہ 9 مئی 2023 کو القادر ٹرسٹ کیس میں بانی پاکستان تحریک انصاف (پی ٹی آئی) عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا۔

اس دوران فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔

مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاؤس بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو)کا ایک گیٹ بھی توڑ دیا تھا۔

اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی کے کارکنوں کے خلاف مقدمات بھی درج کیے گئے تھے۔