وزیراعظم کی بوسنیا کے ایوان صدر کے رکن کو ٹیلی فون، عید الاضحیٰ کی مبارکباد دی
وزیراعظم شہباز شریف نے بوسنیا کے ایوان صدر کے رکن سے ٹیلی فونک گفتگو کے دوران انہیں عید الاضحیٰ کی مبارکباد دی۔
ڈان نیوز کے مطابق وزیراعظم شہباز شریف نے عید الاضحیٰ کے موقع پر بوسنیا اور ہرزیگووینا کے رکن ایوان صدر ڈاکٹر ڈینس بیسرویک سے ٹیلیفون پر بات چیت کی۔
شہباز شریف نے انہیں اور بوسنیا اور ہرزیگووینا کے عوام کو دلی عید کی مبارکباد دی اور ان کی امن، ترقی اور خوشحالی کے لیے دعا کی۔
دوسری جانب، بوسنیا کے رہنما نے بھی وزیراعظم شہباز شریف کو عید کی مبارکباد دی اور نیک جذبات کا اظہار کیا۔
اپنی گفتگو کے دوران شہباز شریف نے اس بات پر زور دیا کہ پاکستان بوسنیا اور ہرزیگوینا کے ساتھ اپنے گہرے برادرانہ تعلقات کو بہت اہمیت دیتا ہے اور تجارت، ثقافت اور عوام کے درمیان تبادلے کے ذریعے دو طرفہ تعاون کو مزید مضبوط بنانے کے لیے پاکستان کے عزم کا اعادہ کیا۔
وزیراعظم نے حالیہ پاک-بھارت بحران کے دوران پاکستان کی حمایت پر بوسنیا کی قیادت کا شکریہ ادا کیا اور جنوبی ایشیا میں امن و سلامتی کو برقرار رکھنے کے لیے پاکستان کی کوششوں سے آگاہ کیا۔
شہباز شریف نے ڈاکٹر بیسرویک کو پاکستان کا سرکاری دورہ کرنے کی دعوت دی جس پر ڈاکٹر ڈینس بیسرویک نے دورے کی دعوت قبول کرتے ہوئے وزیراعظم پاکستان کو بھی بوسنیا اور ہرزیگووینا کے دورے کی دعوت دی۔