کراچی کی 20 سڑکوں پر رکشوں کے داخلے پر پابندی عائد
شہر کی 20 سڑکوں پر 2 ماہ کے لیے 3 اور 5 سیٹر رکشے داخل نہیں ہوسکیں گے، کمشنر کراچی نے پابندی ڈی آئی جی ٹریفک کی سفارش پر لگائی، نوٹی فکیشن
کراچی کی 20 سڑکوں پر رکشوں کے داخلے پر پابندی عائد کردی گئی جن میں شاہراہ قائدین، آئی آئی چندریگر روڈ، شیرشاہ سوری روڈ، عبداللہ ہارون روڈ بھی شامل ہیں۔
ڈان نیوز کے مطابق کمشنر کراچی نے شہر کی 20 سڑکوں پر رکشوں کے داخلے پر پابندی کا نوٹی فکیشن جاری کردیا، پابندی ڈی آئی جی ٹریفک کی سفارش پر لگائی گئی ہے۔
نوٹی فکیشن کے مطابق شہر قائد کی 20 سڑکوں پر 2 ماہ کے لیے 3 اور 5 سیٹر رکشے داخل نہیں ہوسکیں گے۔
نوٹی فکیشن کے مطابق شاہراہ فیصل، شاہراہ قائدین، آئی آئی چندریگر روڈ، شیرشاہ سوری روڈ، شہید ملت روڈ، عبداللہ ہارون روڈ اور شاہراہ پاکستان سمیت شہر کی 20 سڑکوں پر رکشے داخل نہیں ہوسکیں گے۔
نوٹی فکیشن میں کہا گیا ہے کہ پابندی کی خلاف ورزی پر مقدمہ درج کیا جائے گا جب کہ ٹریفک پولیس کو پابندی پر عملدرآمد کرانے کے لیے اختیارات بھی دے دیئے گئے ہیں۔