سندھ میں یکم تا 10 محرم الحرام تک دفعہ 144 نافذ
اسلحہ ساتھ لے کر چلنے، ڈرون، ہیلی کیم، بغیراجازت جلسے اور ریلی نکالنے، لاؤڈ اسپیکر کےغیرقانونی استعمال، اور 9 اور 10 محرم کو موٹرسائیکل کی ڈبل سواری پر پابندی ہوگی، محکمہ داخلہ
محکمہ داخلہ سندھ نے یکم سے 10 محرم الحرام تک صوبے میں دفعہ 144 نافذ کرنے کا فیصلہ کر لیا، جبکہ بغیر اجازت جلسوں، ریلیوں اور اسلحہ ساتھ لے کر چلنے پر پابندی ہوگی۔
ڈان نیوز کے مطابق محرم الحرام میں امن و امان قائم رکھنے کے لیے حکومت سندھ نے دفعہ 144 نافذ کرنے کا فیصلہ کیا، محکمہ داخلہ نے اس ضمن میں نوٹیفکیشن جاری کردیا ہے۔
نوٹیفکیشن کے مطابق یکم تا 10 محرم الحرام سندھ میں میں اسلحہ لے کر چلنے کے اجازت نامے معطل رہیں گے، جبکہ ڈرون، ہیلی کیم، بغیراجازت جلسے اور ریلی نکالنے اور لاؤڈ اسپیکر کےغیرقانونی استعمال پر پابندی ہوگی۔
نوٹیفکیشن کے مطابق 9 اور 10 محرم کو سندھ بھر میں موٹرسائیکل کی ڈبل سواری پر پابندی ہوگی۔