پنجاب میں حالیہ بارشوں کے دوران 14 افراد جاں بحق
پنجاب میں ہفتے کے روز مون سون کی بارشوں کے دوران مزید 2 افراد جاں بحق ہوگئے جس کے بعد گزشتہ 4 دنوں میں ہونے والی اموات کی تعداد 14 ہوگئی۔
تفصیلات کے مطابق ریسکیو حکام اور صوبائی ڈیزاسٹر مینجمنٹ اتھارٹی (پی ڈی ایم اے) نے بتایا کہ بدھ سے اب تک صوبے بھر میں مختلف بارش سے متعلق واقعات میں 12 افراد جاں بحق ہوئے جن میں 8 بچے شامل ہیں جب کہ 39 افراد زخمی ہوئے۔
ریسکیو 1122 کے مطابق لاہور کے شاہدرہ ٹاؤن کے عباس نگر علاقے میں آج صبح 3:20 بجے ایک مکان کی چھت گرنے سے 2 افراد جاں بحق جب کہ 4 زخمی ہوئے۔
بیان میں کہا گیا کہ مکان ایک منزلہ تھا اور چھت مٹی کی بنی ہوئی تھی، لاشوں کو شاہدرہ ہسپتال منتقل کیا گیا جب کہ زخمیوں کو شاہدرہ اور میو ہسپتال لے جایا گیا۔
ترجمان پی ڈی ایم اے کا کہنا تھا کہ بدھ سے جمعہ تک مختلف شہروں میں 25 واقعات رپورٹ ہوئے جو آج بڑھ کر 28 ہو گئے،
رپورٹ کے مطابق زیادہ تر واقعات شدید بارشوں کے باعث دیواریں اور چھتیں گرنے کی وجہ سے پیش آئے، جو چار روز میں ان اموات کی وجہ بنے۔
قصور میں چھت گرنے سے 2 بچے جاں بحق ہوئے جب کہ دیوار گرنے کے ایک واقعے میں 2 مزید بچوں کی جان گئی۔ اوکاڑہ، بہاولنگر اور فیصل آباد میں ایک ایک بچہ چھت گرنے کے واقعات میں جاں بحق ہوا۔
وزیرآباد میں دیوار گرنے سے ایک مرد اور ایک بچہ جاں بحق جب کہ ایک خاتون اور ایک بچہ زخمی ہوئے۔
پی ڈی ایم اے رپورٹ کے مطابق جہلم میں ’بارش کے پانی کے نالے‘ میں ڈوب کر 2 افراد جاں بحق ہوئے جب کہ ایک لوڈر رکشہ بارش کے پانی سے بھرے نالے میں جاگرا۔
پی ڈی ایم اے رپورٹ میں خانیوال میں آسمانی بجلی گرنے کے واقعے کا بھی ذکر کیا گیا جس میں ایک شخص جاں بحق ہوا۔
جن دیگر اضلاع میں ہلاکتیں رپورٹ ہوئیں ان میں منڈی بہاؤالدین، ساہیوال، چنیوٹ، ملتان، شیخوپورہ اور ننکانہ صاحب شامل ہیں۔ علیحدہ طور پر رحیم یار خان میں ایک درخت گرنے سے ایک گائے ہلاک ہوئی۔