کراچی: باپ نے خواجہ سراؤں سے دوستی پر نوجوان بیٹے کو بہیمانہ تشدد کرکے قتل کردیا
کراچی میں باپ نے خواجہ سراؤں سے دوستی پر نوجوان بیٹے کو بہیمانہ انداز میں قتل کردیا، پولیس نے ملزم کو گرفتار کرلیا۔
ڈان اخبار میں شائع رپورٹ کے مطابق پولیس کا کہنا ہے کہ بدھ کو اورنگی ٹاؤن میں ایک 21 سالہ نوجوان کو مبینہ طور پر اس کے والد نے قتل کر دیا۔
اقبال مارکیٹ تھانے کے ایس ایچ او شیر محمد نے ڈان کو بتایا کہ پولیس نے راجا تنویر کالونی، سیکٹر ساڑھے 11 میں علی خان نامی نوجوان کو بیلچے کے وار سے قتل کرنے کے الزام میں اس کے والد عبدالغفار خان کو گرفتار کر لیا ہے۔
پولیس افسر کے مطابق ملزم نے بتایا کہ اس کے بیٹے کے خواجہ سرا افراد سے دوستانہ تعلقات تھے اور وہ ان سے اکثر ملاقات کرتا تھا، والد کا کہنا تھا کہ اس نے بیٹے کو کئی بار ان سے دور رہنے کی ہدایت کی تھی، مگر وہ باز نہ آیا۔
والد نے دعویٰ کیا کہ پہلے اس نے بیٹے کو بجلی کے جھٹکے دیے، اور بعد ازاں بیلچے کے وار سے قتل کر دیا، لاش کو قانونی کارروائی کے لیے عباسی شہید ہسپتال منتقل کر دیا گیا۔
ایس ایچ او کا کہنا تھا کہ ملزم مذہبی رجحان رکھتا ہے اور اس نے قتل پر کسی قسم کی ندامت کا اظہار نہیں کیا، پولیس اب اس بات کی طبی تصدیق کا انتظار کر رہی ہے کہ آیا واقعی مقتول کو بجلی کے جھٹکے دیے گئے تھے۔