پنجاب اسمبلی میں اپوزیشن کے 26 معطل ارکان کو ڈی سیٹ کرنے کا ریفرنس تیار
پنجاب اسمبلی میں اپوزیشن کے 26 معطل ارکان کو ڈی سیٹ کرنے کا ریفرنس تیار کرلیا گیا ہے، جو جلد الیکشن کمیشن پاکستان میں دائر کر دیا جائے گا۔
ڈان نیوز کے مطابق اسپیکر پنجاب اسمبلی ملک محمد احمد خان، سیکریٹری جنرل پنجاب اسمبلی عامر حبیب ریفرنس دائر کرنے کے لیے اسلام آباد پہنچ چکے ہیں، ریفرنس دائر کرنے کے لیے پنجاب اسمبلی سیکریٹریٹ نے تمام ضروری دستاویزات فراہم کر دی ہیں۔
ذرائع کا کہنا ہے کہ دستاویزات میں سابق چیف جسٹس عمر عطا بندیال کا حمزہ شہباز کے خلاف فیصلہ بھی شامل ہے، پنجاب اسمبلی سیکریٹریٹ نے اپوزیشن کی ہنگامہ آرائی کے متعلق تمام ثبوت ریفرنس میں شامل کیے ہیں۔
اسپیکر پنجاب اسمبلی ملک محمد احمد خان بھی اسلام آباد پہنچ گئے ہیں، اسمبلی ذرائع کے مطابق اسپیکر پنجاب اسمبلی، سیکریٹری جنرل پنجاب اسمبلی اسلام آباد میں سینئر قانون دانوں سے مشاورت کریں گے۔
ذرائع کا کہنا ہے کہ قانونی مشاورت کا مقصد ریفرنس کو مزید مضبوط بنانا ہے، مشاورت کے بعد ریفرنس الیکشن کمیشن میں جمع کروایا جائے گا۔
یاد رہے کہ 27 جون کو پنجاب اسمبلی کے اجلاس میں وزیراعلیٰ مریم نواز کی تقریر کے دوران شور شرابہ اور ہنگامی آرائی کے ساتھ ساتھ توڑ پھوڑ کرنے پر اپوزیشن کے 26 ارکان کی رکنیت معطل کی گئی تھی۔
28 جون کو اسپیکر پنجاب اسمبلی ملک احمد خان نے اپوزیشن کے 26 ارکان کو معطل کرتے ہوئے ان ارکان کی نااہلی کے لیے ریفرنس اسی روز الیکشن کمیشن کو بھیجنے کا اعلان کیا تھا۔
ان ارکان نے گزشتہ روز اسمبلی میں مریم نواز کی تقریر کے دوران نعرے بازی اور شدید احتجاج کیا تھا، پنجاب اسمبلی میں توڑ پھوڑ کرنے پر 10 ارکان پر 20 لاکھ روپے جرمانہ بھی عائد کر دیا گیا تھا، سرکاری املاک کو نقصان پہنچانے پر 2 لاکھ 3 ہزار 550 روپے فی کس ادا کرنے کا حکم دیتے ہوئے نوٹی فکیشن جاری کیا گیا تھا۔
یاد رہے کہ اس سے قبل سپریم کورٹ کے فیصلے کے بعد پاکستان تحریک انصاف (پی ٹی آئی) مخصوص نشستوں سے بھی محروم ہوگئی تھی۔