پاکستان اسپورٹس بورڈ کا کھیلوں کی فیڈریشنز میں 2 مدتوں سے زائد عہدوں پر برقرار رہنے کا نوٹس
پاکستان اسپورٹس بورڈ (پی ایس بی) نے کھیلوں کی فیڈریشنز میں 2 مدتوں سے زائد عہدوں پر برقرار رہنے کا نوٹس لے لیا۔
تفصیلات کے مطابق قومی اسپورٹس پالیسی کی خلاف ورزی پر 9 فیڈریشنز عہدیداران کو انتباہی خط ارسال کر دیا۔
قومی اسپورٹس پالیسی کے مطابق فیڈریشن یا ایسوسی ایشن میں کسی بھی عہدیدار کی مدتِ عہدہ 4 سال ہے، کوئی بھی فرد دو مدتوں کے لیے کسی بھی عہدے پر فائز رہ سکتا ہے، دو مدتوں کے بعد دوبارہ اسی عہدے پر تقرری کی اجازت نہیں، ایسے افراد کسی اعلیٰ عہدے یا نئی ایسوسی ایشن کیلئے انتخاب لڑ سکتے ہیں۔
پی ایس بی سے الحاق کے لیے نیشنل اسپورٹس پالیسی پر عمل لازمی ہے، خط میں سپریم کورٹ فیصلے کا حوالہ بھی دیا گیا۔
خط کے متن کے مطابق بیس بال فیڈریشن کے صدر اور خزانچی دو مدتوں سے زائد عہدے پر برقرار ہیں، بیس بال کے سیکریٹری پہلے صدر کے عہدے پر فائز رہے،دوبارہ سیکرٹری جنرل کے عہدے پر کام کررہے ہیں،جو کہ خلاف ضابطہ ہے۔
اسی طرھ تائیکوانڈو و جوڈو فیڈریشن کے صدور اور سیکریٹریز پالیسی کی خلاف ورزی کے مرتکب ہوئے ہیں، سیلنگ و کراٹے فیڈریشنز کے سیکریٹری جنرلز نے مدتِ مقررہ سے تجاوز کیا ہے، خلاف ورزی کے مرتکب عہدیداران 30 یوم میں اصلاح و احوال کریں، بصورت دیگر متعلقہ فیڈریشنز پی ایس بی سے ملنے والے فوائد سے محروم ہوجائیں گے۔