پاکستان اور فرانسیسی ترقیاتی ایجنسی کے درمیان 1.2 کروڑ یورو کے معاہدے پر دستخط
حکومت پاکستان اور فرانسیسی ترقیاتی ایجنسی (اے ایف ڈی) کے درمیان ایک کروڑ 20 لاکھ یورو کے گرانٹ معاہدے پر دستخط ہوگئے۔
وزارت اقتصادی امور کی جانب سے جاری اعلامیے میں بتایا گیا ہے کہ اس معاہدے کا مقصد پنجاب کے منتخب کردہ شہری علاقوں میں پانی اور صفائی کی خدمات کی فراہمی کو موثر بنانا ہے۔
اعلامیے میں مزید کہا گیا ہے کہ سیکریٹری وزارت اقتصادی امور ڈاکٹر کاظم نیاز، فرانسیسی سفیر نکولس گیلی اور اے ایف ڈی کے کنٹری ڈائریکٹر ونسنٹ تھیونو نے اس معاہدے پر دستخط کیے۔
یہ یورپی یونین کی گرانٹ ہے جو کہ اے ایف ڈی کے زیر انتظام فراہم کی جائے گی، معاہدے پر دستخط کی تقریب وزارت اقتصادی امور میں منعقد ہوئی جس میں یورپی یونین اور حکومت پنجاب کے نمائندوں نے بھی شرکت کی۔
یہ منصوبہ لاہور اور فیصل آباد کی واٹر اینڈ سینیٹیشن ایجنسیز (واسا) کی گورننس، آپریشنل کارکردگی، اور سروس کے معیار کو بہتر بنانے میں مددگار ثابت ہوگا، تین اہم پہلوؤں کو مدنظر رکھتے ہوئے اس کو ڈیزائن کیا گیا ہے۔
اعلامیے میں مزید کہا گیا ہے کہ صوبائی سطح پر، یہ منصوبہ ہاؤسنگ، شہری ترقی اور پبلک ہیلتھ انجینئرنگ ڈیپارٹمنٹ کو مؤثر ریگولیٹری فریم ورک کی تیاری اور اس کے نفاذ میں تکنیکی معاونت فراہم کرے گا، جبکہ اس کے ذریعے جدید ٹیکنالوجیز، سسٹمز، اور کاروباری طریقہ کار متعارف کروائے جائیں تاکہ آپریشنز، سروس ڈیلیوری، اور مالی استحکام کو بہتر بنایا جائے۔
مزید برآں، یہ منصوبہ واسا کے اندر ڈیٹا پر مبنی اور شفاف فیصلہ سازی کو فعال کرنے کے لیے آلات کی خریداری اور ڈیجیٹائزیشن میں معاونت کرے گا۔
وزارت اقتصادی امور کے مطابق یہ منصوبہ شہری پانی اور صفائی کے بنیادی ڈھانچے کو مضبوط بنانے اور عوامی خدمات کی فراہمی کو بہتر بنانے کے لیے پاکستان کی کوششوں میں ایک اہم قدم ہے۔
اس کے علاوہ یہ شہری ترقی کے مسائل سے نمٹنے اور پائیدار ترقی کو فروغ دینے کے لیے بین الاقوامی ترقیاتی شراکت داروں کے ساتھ مضبوط شراکت داری قائم کرنے کے لیے حکومتی عزم کی بھی عکاسی کرتا ہے۔