آزاد کشمیر : اسکول وین کو حادثے میں 29 بچے اور ڈرائیور زخمی
آزاد جموں و کشمیر میں ایک اسکول وین پہاڑی سڑک سے نیچے جا گری جس کے نتیجے میں وین میں سوار کم از کم 29 بچے اور ڈرائیور زخمی ہوگیا۔
سینئر سپرنٹنڈنٹ آف پولیس (ایس ایس پی ) مرزا زاہد حسین نے بتایا کہ چکار کے نجی اسلامیہ پبلک اسکول کی وین، جس میں لڑکے اور لڑکیاں سوار تھے، طلبہ کو ان کے گھروں کو لے جا رہی تھی جب تمبریال موڑ کے قریب حادثہ پیش آیا۔
چکار، آزاد کشمیر کی وادی جہلم میں واقع ایک قصبہ اور ہل اسٹیشن ہے، جو سطح سمندر سے 1607 میٹر (5272 فٹ) کی بلندی پر واقع ہے اور ریاستی دارالحکومت مظفر آباد سے تقریباً 46 کلومیٹر (29 میل) کے فاصلے پر ہے۔
ایک سرمائی تفریحی مقام ہونے کی وجہ سے، چکار کے تعلیمی اداروں میں دیگر علاقوں کے برعکس موسم گرما کی طویل تعطیلات نہیں ہوتیں۔
ایس ایس پی مرزا زاہد حسین نے بتایا،’ اندازہ ہے کہ موڑ کاٹتے ہوئے گاڑی ڈرائیور کے کنٹرول سے باہر ہو گئی اور سڑک سے نیچے جاگری جس سے وین سوار تقریباً تمام افراد زخمی ہو گئے۔’
ایس ایس پی کے مطابق، 16 زخمی بچوں کو چکار کے تحصیل ہیڈ کوارٹر ہسپتال میں داخل کرایا گیا، جبکہ ڈرائیور اور 13 بچوں کو ہٹیاں بالا کے ڈسٹرکٹ ہیڈ کوارٹر ہسپتال منتقل کر دیا گیا ہے۔
وین کے ڈرائیور، جس کی شناخت سجاد شاہ کے نام سے ہوئی ہے، اور دو بچوں کی حالت تشویشناک بتائی گئی ہے، تاہم، باقی طلبہ خطرے سے باہر ہیں۔
ایس ایس پی کی جانب سے شیئر کی گئی ایک ویڈیو کلپ میں الٹی ہوئی وین کو ایک جنگلاتی ڈھلوان پر پڑا دکھایا گیا ہے، جس کے ارد گرد مقامی باشندے مدد کے لیے بھاگ دوڑ کر رہے ہیں۔
ایس ایس پی مرزا زاہد حسین نے کہا کہ اگر اونچے درخت نہ ہوتے تو وین مزید نیچے لڑھک سکتی تھی، جس کے نتیجے میں زیادہ نقصان ہوسکتا تھا۔