9 مئی جلاؤ گھیراؤ کے 5 مقدمات میں استغاثہ کے 11 گواہان کے بیانات پر جرح مکمل
لاہور انسداد دہشتگردی عدالت میں 9 مئی جلاؤ گھیراؤ کے 5 مقدمات کے جیل ٹرائل میں استغاثہ کے 11 گواہان کے بیانات پر جرح مکمل کر لی گئی۔
انسداد دہشتگردی عدالت کے ایڈمن جج منظر علی گل نے کوٹ لکھپت جیل میں 9 مئی کے جلاؤ گھیراؤ کے مقدمات کی سماعت کی، ملزمان کے خلاف 7 نئے گواہان نے شہادت ریکارڈ کرائی۔
انسداد دہشتگردی عدالت میں تھانہ شادمان نذر آتش کیس میں 5 گواہان کے بیانات پر جرح مکمل کی گئی۔
دوران سماعت جناح ہاؤس کے قریب پولیس کی گاڑیاں جلانے کے مقدمہ میں 6 گواہان نے شہادت ریکارڈ کرائی۔
انسداد دہشتگردی عدالت نے تھانہ شادمان نذر آتش کیس میں کل مزید گواہان کو طلب کیا ہے۔
یاد رہے کہ گزشتہ برس 9 مئی کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا۔
دوران احتجاج لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔
مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاؤس بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو)کا ایک گیٹ بھی توڑ دیا تھا۔
اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی رہنماؤں اور کارکنان کے خلاف مقدمات بھی درج کیے گئے تھے۔