چینی فضائیہ کے چیف آف اسٹاف کی ایئرچیف مارشل ظہیر احمد سے ملاقات
چینی فضائیہ کے چیف آف اسٹاف جنرل وانگ گانگ اور ایئر چیف مارشل ظہیر احمد بابر سدھو کے درمیان ہونے والی ملاقات میں فضائی قوت، علاقائی سلامتی اور دو طرفہ تعاون پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق چینی فضائیہ کے چیف آف اسٹاف جنرل وانگ گانگ نے ایئر چیف مارشل ظہیر احمد بابر سدھو سے ملاقات کی۔
ترجمان پاک فوج کے مطابق ایئر ہیڈ کوارٹر اسلام آباد میں ہونے والی ملاقات میں فضائی قوت، علاقائی سلامتی اور دو طرفہ تعاون پر تبادلہ خیال کیا گیا۔
آئی ایس پی آر کا کہنا تھا کہ ایئر چیف مارشل ظہیر احمد بابر سدھو نے چینی وفد کا خیر مقدم کیا جب کہ پاکستان اور چین کے تاریخی واسٹریٹجک تعلقات کو سراہا۔
ترجمان پاک فوج نے مزید بتایا کہ جنرل وانگ گانگ کو پاک فضائیہ کی جدید صلاحیتوں اور آپریشنل ڈکٹرائن پر بریفنگ دی گئی۔
ایئر چیف نے تربیت، ٹیکنالوجی اور آپریشنل شعبوں میں تعاون بڑھانے کے عزم کا اعادہ کیا۔
آئی ایس پی آر کا کہنا تھا کہ چینی جنرل نے پاک فضائیہ کی آپریشنل تیاریوں اور ملٹی ڈومین آپریشنز کی تعریف کی، ان کا کہنا تھا کہ یہ ملاقات پاکستان اور چین کے اسٹریٹجک اشتراک کی مضبوطی کا مظہر ہے۔
جنرل وانگ گانگ نے پاک فضائیہ کی حالیہ بھارت سے جھڑپ میں کارکردگی کو سراہتے ہوئے کہا کہ پی اے ایف کا جواب بہادری، نظم و ضبط اور درستگی کی مثال ہے۔