بھارتی اعتراض کے باوجود ایشین کرکٹ کونسل کا اجلاس ڈھاکا میں طلب
بھارت کی جانب سے اعتراض کے باوجود ایشین کرکٹ کونسل (اے سی سی) کے صدر محسن نقوی نے کونسل کا سالانہ اجلاس بنگلہ دیش کے شہر ڈھاکا میں ہی طلب کرلیا۔
تفصیلات کے مطابق اے سی سی کا سالانہ جنرل اجلاس 24 جولائی کو ڈھاکا میں ہوگا جس کے لیے ایشین کرکٹ کونسل نے رکن ممالک کو نوٹس بھیج دیا ہے۔
ذرائع نے بتایا کہ ایشین کرکٹ کونسل کے صدر محسن نقوی نے اے جی ایم اجلاس طلب کیا ہے۔
ذرائع نے بتایا کہ پاکستان اور بنگلہ دیش کے درمیان ٹی 20 سیریز بھی انہی دنوں ڈھاکا میں ہو رہی ہوگی اور اس دوران رکن ممالک بھی مدعو ہوں گے۔
خیال رہے کہ بہت لمبے عرصے کے بعد ایشین کرکٹ کونسل کا اجلاس بنگلہ دیش میں ہورہا ہے۔
اس سے قبل، بھارت اور سری لنکا نے اجلاس کا مقام اور تاریخ تبدیل کرنے کا کہا تھا، دونوں رکن ممالک اجلاس کہیں اور کروانا چاہتے ہیں۔
تاہم، اے سی سی کا اجلاس ڈھاکا میں ہی کروائے جانے کا فیصلہ کرلیا گیا ہے جبکہ اجلاس کی تیاری کے لیے 15 روز کا نوٹس دیا گیا ہے اور اگر کوئی رکن ملک نہیں آسکتا تو ان کے لیے آن لائن شرکت کا آپشن دیا گیا ہے۔
ذرائع اے سی سی کا کہنا تھا کہ دنیا بھر میں آن لائن میٹنگز ہوتی ہیں، اے سی سی اور آئی سی سی کی بھی آن لائن میٹنگز ہوتی رہی ہیں۔