اسلام آباد: ایف آئی اے کی کارروائی، بدعنوانی اور کرپشن میں ملوث 2 اہلکار گرفتار
وفاقی تحقیقاتی ادارے (ایف آئی اے) اینٹی کرپشن سرکل اسلام آباد نے کارروائی کرتے ہوئے بدعنوانی اور کرپشن میں ملوث ایف آئی اے کے 2 اہلکاروں کو گرفتار کر لیا اور مشترکہ تحقیقاتی ٹیم تشکیل دے دی۔
ڈان نیوز کے مطابق ترجمان نے بتایا کہ ایف آئی اے کے ڈائریکٹر جنرل رفعت مختار کی ہدایت پر ادارے میں بھی احتساب کا عمل جاری ہے جبکہ بدعنوانی اور کرپشن میں ملوث ایف آئی اے کے 2 اہلکاروں کو گرفتار کر کے جوائنٹ انوسٹیگیشن ٹیم تشکیل دے دی۔
گرفتار ملزمان میں سب انسپکٹر وسیم احمد اور کانسٹیبل عاقب محمود شامل ہیں، جو اینٹی ہیومن ٹریفکنگ سرکل اسلام آباد میں تعینات تھے۔
ترجمان کے مطابق گرفتار اہلکاروں نے افغان شہریوں کو جاری کردہ ای ویزا مقدمے میں گرفتار ملزم زبیر سے دوران جسمانی ریمانڈ رشوت کا تقاضا کیا تھا، گرفتار اہلکاروں نے ملزم کو جسمانی ریمانڈ کے دوران سہولتکاری فراہم کرنے کے عوض 20 لاکھ روپے رشوت طلب کی تھی۔
مذکورہ رقم کے عوض اہلکاروں نے ملزم کو جوڈیشل ریمانڈ پر بھجوانے کی یقین دہانی کروائی تھی، اہلکاروں کو گرفتار کر کے تفتیش کا اغاز کر دیا گیا۔
ترجمان نے بتایا کہ اب تک افغان شہریوں کو غیر قانونی ای ویزا جاری کرنے میں ملوث گینگ کے 6 ملزمان گرفتار ہو چکے ہیں، گرفتار ملزمان میں عبدالعزیز، احمد سخی، عاطف احمد، نادر رحیم عباسی، ابرار احمد اور زبیر احمد شامل ہیں۔
گرفتار ایف آئی اے اہلکاروں سے تفتیش کے لیے اینٹی کرپشن سرکل اسلام آباد کی 4 رکنی جے آئی ٹی تشکیل دے دی گئی، جس کی سربراہی اسسٹنٹ ڈائریکٹر نعمان خلیل کریں گے، دیگر اراکین میں سب انسپکٹر شمس خان، سب انسپکٹر شہریار اور کانسٹیبل مہدی شامل ہیں ۔
جے آئی ٹی غیر جانبدارانہ تحقیقات کر کے رپورٹ پیش کرے گی، ڈی جی ایف آئی اے کا کہنا تھا کہ محکمانہ احتساب کا مقصد ادارے کو کرپشن اور دیگر بے ضابطگیوں میں ملوث کالی بھیڑوں سے پاک کرنا ہے۔