اسلام آباد: ڈرون ٹیکنالوجی کی مدد سے ٹریفک قوانین کی خلاف ورزی پر جرمانے عائد
وفاقی دارالحکومت، اسلام آباد میں ٹریفک پولیس کی جانب سے ڈرون ٹیکنالوجی کے ذریعے کاروائیاں جاری ہیں، اسلام آباد کی مرکزی شاہراہوں پر ٹریفک قوانین کی خلاف ورزی پر جرمانے عائد کردیے گئے۔
ڈان نیوز کے مطابق ترجمان اسلام آباد پولیس نے بتایا ہے کہ اسلام آباد ٹریفک پولیس ڈرون کیمروں کی مدد سے ٹریفک قوانین پر عمل درآمد کو یقینی بنارہی ہے، ابتدائی طور پر ڈرون ٹیکنالوجی کا استعمال ایکسپریس وے اور سری نگر ہائی وے پر ہوگا۔
ترجمان اسلام آباد ٹریفک پولیس کے مطابق لین کی خلاف ورزی، ڈرفٹنگ، اوور لوڈنگ، ون ویلنگ اور متعدد خلاف ورزیوں کی مانیٹرنگ جاری ہے، ڈرون ٹیکنالوجی کے ذریعے نشان دہی کر کے مختلف خلاف ورزیوں پر 300 سے زائد ڈرائیورز کے خلاف قانونی کارروائیاں کی گئیں۔
ترجمان ٹریفک پولیس کے مطابق 350 سے زائد شہریوں کو آگاہی فراہم کی گئی، جب کہ متعدد گاڑیوں کو خلاف ورزی پر تھانے میں بند کیا گیا۔
ترجمان کا کہنا ہے کہ ڈرون کیمروں کی مدد سے خلاف ورزی کی نشاندہی اور فی الفور چالان اور تھانے میں بند کیا جا رہا ہے، اگلے مرحلے میں تمام سیکٹرز اور دیگر شاہراہوں پر بھی یہ ٹیکنالوجی استعمال ہوگی۔