’تعصب کارڈ‘ کھیلنے والوں کا میئر کہتا تھا اختیارات نہیں، اب کام ہوتا نظر آرہا ہے، مرتضیٰ وہاب
میئر کراچی مرتضیٰ وہاب نے کہا ہے کہ ہر چیز کا الزام میئر اور ڈپٹی میئر پر لگادیا جاتا ہے، باتیں کرنے اور تعصب کا کارڈ کھیلنے سے مسائل حل نہیں ہوتے، ’تعصب کارڈ‘ کھیلنے والوں کا میئر کہتا تھا اختیارات نہیں، اب کام ہوتا نظر آرہا ہے۔
ڈان نیوز کے مطابق میئر کراچی مرتضیٰ وہاب اور ڈپٹی میئر سلمان عبداللہ مراد نے ضلع شرقی کی 8 یو سیز میں پیور بلاکس نصب کرنے کا سنگ بنیاد رکھ دیا، اس موقع پر میڈیا سے گفتگو کرتے ہوئے مرتضیٰ وہاب نے کہا کہ یوسی چیئرمینز کے ذریعے کام ہوتا نظر آرہا ہے، تم ہمیں جیتنے دو یا نہ جیتنے دو، ہمیں سب سے پیار ہے، پاکستان پیپلز پارٹی (پی پی پی) کا منشور لوگوں کی بلاتفریق خدمت ہے۔
مرتضیٰ وہاب نے کہا کہ ’تعصب کارڈ‘ کھیلنے والوں کا میئر کہتا تھا، اختیارات نہیں ہیں، اب شہر میں کام ہوتا ہوا نظر آرہا ہے۔
انہوں نے کہا کہ کے ایم سی کی حدود میں 106 بڑی سڑکیں ہیں، گلیاں نہیں، گلی محلوں کے اندر کے کام ٹاؤنز کے ہیں، گلی محلوں کے کام کے لیے بھی کراچی میونسپل کارپوریشن (کے ایم سی) کو آنا پڑتا ہے۔
ان کا کہنا تھا کہ ضلع شرقی میں ہمارے ٹاؤنز بھی ہیں، جماعت اسلامی اور پاکستان تحریک انصاف (پی ٹی آئی) کے بھی ٹاؤن ناظمین ہیں۔
میئر کراچی نے کہا کہ پاکستان پیپلز پارٹی کی سوچ ہے کہ ہر جگہ کام کرنا ہے، ضلع شرقی میں ڈیڑھ ارب روپے خرچ کرنے جا رہے ہیں۔
انہوں نے یہ بھی کہا کہ لوگ دیکھیں گے کہ روڈ کٹنگ کے پیسے کون لیتا ہے، ہمارا جینا مرنا کراچی والوں کے ساتھ ہے، اس مٹی کی خدمت ہمارا فرض ہے۔