انٹرنیشنل کرکٹ کونسل (آئی سی سی) نے جون 2025 کے لیے پلیئر آف دی منتھ کا اعلان کر دیا، ٹیسٹ چیمپن شپ کے فائنل میں جنوبی افریقہ کو تاریخی کامیابی دلوانے والے ایڈن مارکرم کو یہ اعزاز دیا گیا ہے۔

آئی سی سی کی ویب سائٹ پر جاری کر دی، بیان کے مطابق جنوبی افریقہ کے بلے باز ایڈن مارکرم آئی سی سی ورلڈ ٹیسٹ چیمپئن شپ کے فائنل میں شاندار کارکردگی پر پلیئر آف دی منتھ کا ایوارڈ دیا گیا۔

یاد رہے کہ ورلڈ ٹیسٹ چیمپئن شپ کے تاریخی فائنل میں ایڈم مارکرم نے میچ کی دوسری اننگز میں 136 رنز کی ذمہ دارانہ اننگز کھیل کر پروٹیز کو تاریخی فتح دلائی۔

ایڈن مارکرم نے نہ صرف بلے بازی میں بلکہ گیند بازی میں بھی اہم کردار نبھایا تھا، انہوں نے اپنے آف اسپن سے اسٹیو اسمتھ کی قیمتی وکٹ حاصل کی اور بعد میں جوش ہیزل ووڈ کو بھی آؤٹ کیا۔

اس ماہ کے لیے پلیئر آف دی منتھ کی دوڑ میں ایڈن مارکرم کے ساتھ ان کے ہم وطن کگیسو ربادا اور سری لنکا کے اسٹار بلے باز پاتھم نسانکا بھی شامل تھے۔

خواتین کی کیٹیگری

دوسری جانب، ویسٹ انڈیز کی اسٹار آل راؤنڈر ہیلی میتھیوز نے اپنی شاندار فارم کا سلسلہ برقرار رکھتے ہوئے ایک بار پھر آئی سی سی ویمنز پلیئر آف دی منتھ کا ٹائٹل جیت لیا۔

میتھیوز کو یہ اعزاز جنوبی افریقہ کے خلاف ہوم سیریز میں شاندار کارکردگی دکھانے پر دیا گیا، جہاں وہ سیریز کی بہترین کھلاڑی قرار پائیں اور ویسٹ انڈیز کو 1-2 سے فتح دلانے میں مرکزی کردار ادا کیا۔