ناراض امیدواروں کیخلاف پارٹی کارروائی کرے گی، وزیراعلیٰ خیبرپختونخوا
وزیراعلی خیبرپختونخوا علی امین گنڈاپور نے کہا ہے کہ عدالتی احکامات کے مطابق مخصوص نشستوں کے ارکان حلف اُٹھائیں گے، ناراض امیدواروں کیخلاف پارٹی ڈسپلن کارروائی کرے گی۔
ڈان نیوز کے مطابق پشاور میں میڈیا سے گفتگو کرتے ہوئے وزیراعلی خیبرپختونخوا علی امین گنڈاپور نے کہا ہے کہ امیدواروں کی جانب سے کاغذات واپس نہ لینے پر ہمیں نقصان ہوا ہے، اپوزیشن کے ساتھ پہلے 8 اور 3 کے فارمولے پر اتفاق ہوا تھا، اب ہمیں 6 اور اپوزیشن کو 5 سیٹیں ملیں گی۔
علی امین گنڈاپور نے مزید کہا کہ اپوزیشن سے اتحاد صرف سینیٹ انتخابات تک ہے، جو بھی ہورہا ہے وہ سربراہ پاکستان تحریک انصاف (پی ٹی آئی) عمران خان کے احکامات پر ہو رہا ہے۔
سینیٹ میں ہارس ٹریڈنگ کے سوال کے جواب میں وزیراعلیٰ خیبرپختونخوا نے کہا کہ سینیٹ میں خرید و فروخت کو ہارس نہیں ڈنکی ٹریڈنگ کہتا ہوں، یہ ایک حقیر کام ہے، ہم نے فیصلہ کیا ہے کہ سینیٹ میں خرید و فروخت نہیں ہونے دیں گے۔
قبل ازیں، خیبرپختونخوا میں مخصوص ارکان اسمبلی کی حلف برداری کے وقت میں تبدیلی ہوگئی ہے، حلف برداری تقریب آج شام 6 بجے گورنر ہاؤس پشاور میں ہوگی۔
ڈان نیوز کے مطابق مخصوص نشستوں پر نامزد ہونے والے ارکان اسمبلی کی حلف برداری کے لیے تمام ارکان اسمبلی کو مدعو کردیا گیا ہے، وقت کی تبدیلی سے ارکان اسمبلی کو بھی آگاہ کر دیا گیا ہے۔
خیال رہے کہ 25 مخصوص نشستوں کے اراکین میں 21 خواتین اور 4 اقلیتی ارکان شامل ہیں، جے یو آئی اور ن لیگ کے 7-7 ، پیپلز پارٹی کے4 ، اے این پی کے 2 اور پی ٹی آئی پی کا ایک رکن شامل ہے۔