توہینِ مذہب الزامات کی تحقیقات کیلئے کمیشن بنانے کے فیصلے کیخلاف انٹراکورٹ اپیل دائر
اسلام آباد ہائیکورٹ کی جانب سے توہینِ مذہب کے الزامات کی تحقیقات کے لیے کمیشن تشکیل دینے کے فیصلے کے خلاف راؤ عبد الرحیم نے انٹراکورٹ اپیل دائر کردی۔
ڈان نیوز کے مطابق انٹرا کورٹ اپیل میں راؤ عبد الرحیم نے سنگل بینچ کا فیصلہ کالعدم قرار دینے اور درخواست بھی ناقابل سماعت قرار دینے کی استدعا کی ہے۔
درخواست کے متن کے مطابق سنگل بینچ نے درخواست گزاروں کے الزامات کے جواب میں ہمارا موقف ہی نہیں سُنا، درخواست درخواست گزاروں کے پاس ٹرائل کورٹ سمیت درجنوں فورمز موجود تھے، لیکن وہاں رجوع نہیں کیا گیا۔
انٹراکورٹ اپیل میں راؤ عبد الرحیم نے کہا کہ کرمنل مقدمات میں کمیشن کی تشکیل قانون کی شقوں اور اعلیٰ عدالتوں کے فیصلوں کے خلاف ہے۔
یاد رہے کہ جسٹس سردار اعجاز اسحٰق خان نے اپنے فیصلے میں وفاقی حکومت کو توہین مذہب کے مقدمات کے حالے سے تحقیقات کرنے کے لیے ایک ماہ میں کمیشن تشکیل دینے کا حکم دیا تھا۔
اسلام آباد ہائی کورٹ نے مزید ریمارکس دیے تھے کہ کمیشن کو اگر مزید وقت چاہیے ہو تو عدالت سے رجوع کر سکتا ہے۔