تیراہ واقعہ: صوبائی حکومت کا لواحقین کیلئے ایک کروڑ روپے، زخمیوں کیلئے 25 لاکھ روپے امداد کا اعلان
خیبر پختونخوا حکومت نے تیراہ واقعے پر افسوس کا اظہار کرتے ہوئے جاں بحق افراد کے لواحقین کے لیے ایک کروڑ روپے جبکہ زخمیوں کے لیے 25 لاکھ روپے مالی امداد کا اعلان کر دیا، وزیر اعلیٰ کے مشیر اطلاعات بیرسٹر ڈاکٹر سیف کا کہنا ہے کہ وزیر اعلیٰ علی امین گنڈاپور خود واقعے کی نگرانی کر رہے ہیں اور مسلسل متعلقہ انتظامیہ سے رابطے میں ہیں۔
بیرسٹر ڈاکٹر سیف کے مطابق وزیراعلیٰ نے قبائلی عمائدین کا جرگہ پشاور طلب کیا ہے جس میں عمائدین کے تحفظات سنے جائیں گے، انہوں نے کہا کہ خیبر پختونخوا حکومت واقعے پر نہایت افسردہ ہے اور متاثرہ خاندانوں کے ساتھ غم کی اس گھڑی میں مکمل یکجہتی کا اظہار کرتی ہے۔
بیرسٹر سیف نے مزید بتایا کہ ایسے واقعات کی روک تھام کے لیے گزشتہ ہفتے آل پارٹیز کانفرنس طلب کی گئی تھی، تاہم گورنر اور اپوزیشن جماعتوں نے غیر سنجیدگی کا مظاہرہ کرتے ہوئے کانفرنس کا بائیکاٹ کیا۔
صوبائی حکومت نے یقین دہانی کرائی ہے کہ متاثرہ خاندانوں کو ہر ممکن تعاون فراہم کیا جائے گا اور حالات کی بہتری کے لیے فوری اقدامات کیے جا رہے ہیں۔
یاد رہے کہ گزشتہ روز خیبر کے علاقے تیراہ میدان میں مرکزی باغ بریگیڈ ہیڈکوارٹر کے باہر احتجاج کے دوران مظاہرین پر فائرنگ سے 3 افراد جاں بحق اور 8 زخمی ہوگئے تھے۔