خیبر پختونخوا: سینیٹ کی خالی نشست پر ضمنی انتخاب کل ہوگا، پی پی امیدوار دستبردار
خیبر پختونخوا میں ثانیہ نشتر کے استعفے کے بعد خالی ہونے والی سینیٹ کی نشست پر ضمنی الیکشن کل ہو گا، پاکستان پیپلز پارٹی ( پی پی پی) کی امیدوار راحیلہ بی بی مسلم لیگ (ن) کی امیدوار کے حق میں دستبردار ہو گئیں۔
ڈان نیوز کے مطابق الیکشن کمیشن آف پاکستان (ای سی پی) کی جانب سے بتایا گیا ہے کہ سینیٹ کی خالی نشست پر ضمنی انتخاب کے لیے جرگہ ہال کو پولنگ اسٹیشن قرار دیا گیا ہے۔
سمیرا شمس، صائمہ خالد، مشال اعظم، مومنہ خالد اور مہتاب ظفر آزاد امیدوار کی حیثیت سے الیکشن میں حصہ لے رہی ہیں۔
الیکشن کمیشن کے مطابق الیکشن خفیہ رائے شماری کے ذریعے ہوں گے، پولنگ اسٹیشن کے اندر موبائل فون لے جانے پر پابندی عائد کی گئی ہے۔
سینیٹ کی یہ نشست پاکستان تحریک انصاف (پی ٹی آئی) کی سینیٹر ثانیہ نشتر کے استعفے کے بعد خالی ہوئی تھی۔