وزارت بحری امور کا فیری لائسنس کا اجرا ایک ماہ میں کرنے کا فیصلہ
وزارت بحری امور نے فیری لائسنس کا اجرا چھ ماہ کے بجائے ایک ماہ میں کرنے کا فیصلہ کرلیا، وزارت بحری امور ابتدائی تجرباتی مرحلے کے لیے روٹس اور فریم ورک تیار کر رہی ہے، چند ہفتوں میں فیری سروس کا روڈ میپ جاری کرے گی۔
ڈائریکٹر جنرل پورٹس اینڈ شپنگ نے وزیر بحری امور کو فیری سروس کے لائسنس کے اجراپر بریفنگ دی ، اس موقع پر وفاقی وزیر جنید انوار چوہدری نے کہا کہ لائسنسنگ کے عمل کو ڈیجیٹل اور سنگل ونڈو نظام میں منتقل کریں گے، غیر ضروری تاخیر ختم کرکے فوری فیصلے کیے جائیں۔
انہوں نے کہا کہ فیری آپریٹرز کے لیے ہر ممکن سہولیات فراہم کریں گے،بینک یا انشورنس گارنٹی، دونوں کے آپشنز پر غور ہوگا۔
وفاقی وزیر جنید انوار چوہدری نے کہا کہ وزارت بحری امور نے فیری لائسنس کا اجرا چھ ماہ کے بجائے ایک ماہ میں کرنے کا فیصلہ کر لیا۔
وزارت بحری امور کے حکام نے فیری سروس کے اجرا کی کوششیں تیز کردی ہیں، وزارت بحری امور ابتدائی تجرباتی مرحلے کے لیے روٹس اور فریم ورک تیار کر رہی ہے اور چند ہفتوں میں فیری سروس کا روڈ میپ جاری کیا جائے گا، وزارت کی پرائیویٹ آپریٹرز اور متعلقہ اتھارٹیز سے مشاورت جاری ہے۔
وفاقی وزیر بحری امور نے کہا کہ فیری سروس زائرین کے لیے سستا، محفوظ اور قابلِ اعتماد ذریعہ بن سکتی ہے، فیری سروس سے ایران، عراق جانے والے زائرین کے لیے نیا سفری متبادل دستیاب ہوگا۔
انہوں نے کہا کہ کاروباری برادری کے خدشات دور کیے جائیں گے، فیری سروس سے سیاحت، کاروبار اور مذہبی سفر کو فروغ ملے گا۔