جنوبی وزیرستان: جھڑپ میں قبائلی رہنما کا بھائی جاں بحق، کمانڈر سمیت کئی دہشتگرد ہلاک
جنوبی وزیرستان دژہ غونڈئی میں دہشتگردوں اور قبائلی رہنما ملک عاشق نور کے قبیلے کے درمیان جھڑپ میں ملک عاشق نور کے بھائی جان کی بازی ہار گئے، دوسرا بھائی زخمی ہوگیا، دہشت گردوں کو بھی بھاری نقصان پہنچا، ایک کمانڈر موقع پر ہلاک، متعدد دہشتگردوں کے مارے جانے کی اطلاعات ہیں۔
ڈان نیوز کے مطابق ذرائع کا کہنا ہے کہ جنوبی وزیرستان دژہ غونڈئی میں دہشت گردوں اور قبائلی رہنماء ملک عاشق نور کے قبیلے کے درمیان جھڑپ کا وقعہ پیش آیا ہے، اس جھڑپ میں ملک عاشق نور کے بھائی جان کی بازی ہار گئے ہیں، جب کہ ان کا دوسرا بھائی زخمی ہوگیا ہے۔
ملک عاشق نور کے 2 بھائی، صدراتی ایوارڈ یافتہ ملک اسلم نور اور ملک خادین بھی چند سال قبل دہشتگردی کے واقعات میں شہید ہو چکے ہیں۔
ملک عاشق نور کا تعلق احمدزئی وزیر قبیلے کے ذلی خیل شاخ سے ہے۔
واضح رہے کہ خیبر پختونخوا کے کئی اضلاع شورش سے متاثر ہیں، جہاں شدت پسند گروپوں کی موجودگی کی وجہ سے شہریوں کی آزادانہ نقل و حرکت بھی متاثر ہے، فورسز کی جانب سے کئی علاقوں میں ٹارگٹ آپریشن کرکے علاقے کلیئر کرانے کی حکمت عملی اپنائی جا رہی ہے۔