وزیر مملکت کی سربراہی میں سول آرمڈ فورسز کا سروس اسٹرکچر یکساں کرنے کیلئے کمیٹی قائم
پاکستان رینجرز اور فرنٹیئر کور (ایف سی) سمیت تمام سول آرمڈ فورسز کے سروس اسٹرکچر کو یکساں کرنے کا منصوبہ سامنے آگیا، جس پر عمل درآمد سے سول آرمڈ فورسز میں رینک، تنخواہ اور الاؤنسز یکساں ہوجائیں گے۔
ڈان نیوز کے مطابق وزیر مملکت برائے داخلہ طلال چوہدری کی سربراہی میں کمیٹی تشکیل دی گئی ہے، جس کا شریک چیئرمین وفاقی سیکریٹری داخلہ کو مقرر کیا گیا ہے، کمیٹی سول آرمڈ فورسز کے سروس اسٹرکچر کو یکساں بنانے کے منصوبے پر کام کرے گی۔
ذرائع کا کہنا ہے کہ منصوبے پر عملدرآمد سے رینجرز، ایف سی سمیت تمام سول آرمڈ فورسز میں رینک، تنخواہ، الاؤنسز ایک جیسے ہوجائیں گے، کمیٹی میں وزارت داخلہ کے ایڈیشنل سیکریٹری کو بطور رکن شامل کیا گیا ہے۔
کمیٹی میں وزارت خزانہ، اسٹیبلشمنٹ ڈویژن اور ڈائریکٹوریٹ ملٹری آپریشنز کے نمائندے بھی شامل ہیں، وزارت داخلہ کے جوائنٹ سیکریٹری کمیٹی کے سیکریٹری ہوں گے، تمام سول آرمڈ فورسز کو کمیٹی میں نمائندگی دی گئی ہے۔
ذرائع کا کہنا ہے کہ کمیٹی سول آرمڈ فورسز کے سروس اسٹرکچر کو یکساں کرنے کا قابل عمل روڈ میپ تجویز کرے گی، سول آرمڈ فورسز میں پنجاب رینجرز، سندھ رینجرز، خیبر پختونخوا کی ایف سی نارتھ اور بلوچستان کی ایف سی ساؤتھ شامل ہیں۔
پاکستان کوسٹ گارڈز، گلگت بلتستان اسکاؤٹس، فیڈرل کانسٹیبلری بھی سول آرمڈ فورسز میں شامل ہیں۔