ایف بی آر میں اصلاحات سے ٹیکس کلیکشن میں اضافہ حکومت کیلئے باعث اطمینان ہے، وزیراعظم
وزیراعظم شہباز شریف نے کہا کہ وفاقی حکومت کی طرف سے ایف بی آر میں کی گئی اصلاحات کے نتیجے میں جی ڈی پی میں ٹیکس کلیکشن کے تناسب میں اضافہ حکومت کے لیے باعث اطمینان ہے، وفاقی حکومت اور وہ خود حکام کی طرف سے لیے گئے اصلاحاتی اقدامات کی مکمل حمایت اور تحفظ کریں گے ۔
وزیراعظم شہباز شریف کی زیر صدارت فیڈرل بورڈ آف ریونیو میں مجوزہ اصلاحات پر ہفتہ وار جائزہ اجلاس ہوا، بریفنگ میں بتایا گیا کہ ایف بی آر نے نئی مالی سال کے پہلے ماہ جولائی میں اپنا ٹیکس وصولی کا ہدف پورا کیا ہے، آئندہ مہینوں میں بھی مکمل ہدف حاصل کرنے کی توقع ہے، ملک بھر میں کسٹم کلیئرنس کے لیے ڈیجیٹل انفورسمنٹ سٹیشنز کا قیام ترجیحی بنیاد پر جاری ہے۔
وزیراعظم شہباز شریف نے کہا کہ اصلاحات کی راہ میں سرخ فیتے اور ادارہ جاتی رکاوٹیں ختم کر کے اصلاحات کے مستقل نفاذ کو یقینی بنائیں، کسٹم کلیئرنس میں انقلابی اصلاحات کی ملک بھر میں یکساں اور موثر نفاذ کو یقینی بنایا جائے۔
وزیراعظم نے کہا کہ کسٹم کلیرنس کے اصلاحاتی ایجنڈا میں ٹیکنالوجی کے استعمال سے اداراجاتی کارروائیوں میں درکار وقت کو کم سے کم کیا جائے، ایف بی ار اصلاحات کے نتیجے میں ٹیکس کلیکشن کے ثمرات کو ائندہ مالی سال میں برقرار رکھنے کے لیے وفاق اور صوبے باہمی ہم آہنگی اور مربوط حکمت عملی سے کام کریں۔
وزیراعظم نے کہا کہ آئندہ مالی سال میں پہلے سے عائد کردہ ٹیکسز کا موثر اور عمدہ نفاذ ٹیکس کلیکشن کو مزید بڑھانے میں کلیدی کردار ادا کرے گا، جی ڈی پی میں ٹیکس کلیکشن کے تناسب میں اضافے کے لیے ایف بی آر، متعلقہ وفاقی ادارے اور صوبوں کی مشاورت سے اسٹریٹجی بنائیں، ایف بی ار کے آئندہ مالی سال کے ٹیکس کلیکشن اور دیگر اصلاحاتی اہداف کے منظور شدہ مقررہ وقت میں کوئی تبدیلی نہیں کی جائے گی۔
وزیراعظم نے کہاکہ فیڈرل بورڈ آف ریونیو اور کسٹم کلیئرنس کے اصلاحاتی نظام سے عوامی آگاہی کے لیے دونوں ادارے وزارت اطلاعات و نشریات کے تعاون سے اپنی استعداد کار کو بڑھائیں ۔
دریں اثنا، وزیرِ اعظم شہباز شریف نےچھوٹے اور درمیانے درجے کے کسانوں کیلئے کم لاگت قرضوں کے حصول میں آسانی پیدا کرنے کی ہدایت کردی۔
وزیرِ اعظم محمد شہباز شریف کی زیرِ صدارت زرعی ترقیاتی بینک کی اصلاحات اور کسانوں کو قرضوں کے حصول میں آسانی پر جائزہ اجلاس منعقد ہوا۔
اجلاس کو زرعی ترقیاتی بینک کی جاری اصلاحات اور نجی بینکوں کی جانب سے زرعی شعبے کو قرض کی فراہمی پر بھی بریفنگ دی گئی۔
وزیراعظم شہباز شریف نے کہا کہ چھوٹے کسانوں کو کم لاگت قرض کی فراہمی حکومت کی اولین ترجیحات میں شامل ہے، زرعی ترقیاتی بینک کی بہتری کے لیے اصلاحات کا نفاذ تیز کیا جائے۔
وزیراعظم نے کہا کہ زرعی ترقیاتی بینک اور کسانوں کو قرضوں کی فراہمی کے لیے اقدامات پر ہر تین ہفتے بعد اجلاس کی صدارت خود کروں گا۔
وزیراعظم نے کہا ہےکہ زرعی پیدوار میں اضافے کیلئے کم رقبے والے کسان کو عزت دینی ہوگی۔