سونے کی قیمتوں میں پھر اضافہ ہو گیا
24 قیراط کے حامل فی تولہ خالص سونے کی قیمت ایک ہزار 300 روپے بڑھ کر 3 لاکھ 59 ہزار 300 روپے ہو گئی، جیولرز ایسوسی ایشن
ملک بھر میں آج سونے کی قیمتوں میں ایک ہزار 300 روپے کا اضافہ ریکارڈ کیا گیا ہے۔
سرکاری خبر رساں ادارے ’اے پی پی‘ کے مطابق آل پاکستان صرافہ جیمز اینڈ جیولرز ایسوسی ایشن نے بتایا کہ 24 قیراط کے حامل فی تولہ خالص سونے کی قیمت ایک ہزار 300 روپے بڑھ کر 3 لاکھ 59 ہزار 300 روپے ہو گئی۔
اسی طرح 24 قیراط 10 گرام سونا ایک ہزار 114 روپے مہنگا ہو کر 3 لاکھ 8 ہزار 41 روپے میں فروخت ہواجبکہ 22 قیراط 10 گرام سونے کے نرخ 1,022 روپے بڑھ کر 2 لاکھ 82 ہزار 381 روپے ہو گئے۔
فی تولہ اور 10 گرام چاندی کی قیمت میں 39 روپے اور 33 روپے اضافے سے بالترتیب 4 ہزار 10 روپے اور 3 ہزار 437 روپے ریکارڈ کی گئی۔
ادھر، بین الاقوامی مارکیٹ میں سونے کی قیمت 13 ڈالر بڑھ کر 3 ہزار 366 ڈالر ہو گئی۔