کل کا احتجاج آخری نہیں تھا، یہ سلسلہ جاری رہے گا، سلمان اکرم راجا
پاکستان تحریک انصاف ( پی ٹی آئی) کے جنرل سیکریٹری سلمان اکرام راجا نے کہا ہے کہ کل احتجاج میں لوگ کیوں نہیں پہنچے پارٹی میں اس پر بات کروں گا، کل کا احتجاج آخری احتجاج نہیں تھا یہ عمل جاری رہے گا۔
پی ٹی آئی رہنما بیرسٹر سلمان اکرم راجا نے اڈیالہ جیل کے باہر میڈیا سے گفتگو کرتے ہوئے کہا کہ احتجاج میں شامل نہ ہونے کی اگر کوئی معقول وجہ نہیں تو اس کا جواب دینا پڑے گا۔
انہوں نے کہا کہ کل کے احتجاج بارے میں نے کہا تھا یہ صوبائی اور مقامی سطح کا ہوگا، میں سمجھتا ہوں کل کا دن بڑی حد تک کامیاب رہا، صوبائی و مقامی قیادت کو بتایا گیا تھا وہ خود احتجاج کو ترتیب دے، لوگ کیوں نہیں نکلے اس پر عمران خان سے مشاورت کریں گے۔
رہنما پی ٹی آئی نے کہا کہ میں اور محمود اچکزئی کل رات 11 بجے تک بانی کی بہنوں کے ساتھ چکری انٹرچینج پر موجود رہے، کل کا احتجاج اچھی کوشش تھی اس میں مزید بہتری آئے گی، کل کا احتجاج آخری احتجاج نہیں تھا یہ عمل جاری رہے گا۔
انہوں نے کہا کہ کل اسپیکر سے ملاقات کے بارے میں کچھ کہنا جلد بازی ہوگی، مذاکرات کا فیصلہ بالآخر عمران خان نے کرنا ہے ، مذاکرات ان کی اجازت سے ہوں گے۔
انہوں نے کہا کہ جب ایک ایس ایچ او ہائیکورٹ کے احکامات کو نہیں مانتا تو ایسے ماحول میں کیا مذاکرات ہوں گے۔
بیرسٹر سلمان اکرام راجا نے کہا کہ اسپیکر صاحب سے یہ بات ہوئی تھی کہ ہمارے کچھ ممبران پارلیمنٹ میں تھے ہمیں اڈیالہ جیل آنے میں دیر ہو رہی تھی،اسپیکر صاحب سے درخواست کی تھی کہ مزید دیر نہیں ہونی چاہیے۔
رہنما پی ٹی آئی نے کہا کہ توشہ خانہ ٹو کا ٹرائل مکمل طور پر غیر آئینی اور غیر قانونی ہے، سائفر کیس میں بھی فیملی، میڈیا اور وکلا کو داخلے سے روکا گیا تھا، سائفر کیس کا ٹرائل ہائی کورٹ نے دو مرتبہ کالعدم قرار دیا تھا۔
انہوں نے کہا کہ ہائیکورٹ کی واضح ہدایات ہیں اگر میڈیا، وکلا اور فیملی کو داخلہ نہیں دیا جاتا تو یہ اوپن ٹرائل نہیں، 26ویں ترمیم کے بعد پھر میڈیا، فیملی اور وکلا کو روکا جا رہا ہے۔
بیرسٹر سلمان اکرم راجا کا کہنا تھا کہ توشہ خانہ ٹو کیس میں میرا وکالت نامہ ہے مجھے بھی روکا گیا ہے، ہم اس غیر آئینی ٹرائل کے خلاف قانونی چارہ جوئی کریں گے۔
انہوں نے کہا کہ جب تک قانون کی اطاعت نہیں ہوگی یہ ٹرائل نہیں چل سکتا، ہمارے سینئر وکیل بیرسٹر سلمان صفدر اندر گئے ہیں وہ یہ نکتہ عدالت کے سامنے اٹھائیں گے۔