قومی ویمن کرکٹرز کیلئے سینٹرل کنٹریکٹ کا اعلان، عالمی نمبر ون باؤلر سعدیہ اقبال اے کیٹیگری میں شامل
پاکستان کرکٹ بورڈ نے قومی ویمنز کرکٹز کے لیے سینٹرل کنٹریکٹ 26-2025 کا اعلان کر دیا، نئے کنٹریکٹس 50 فیصد اضافے کے ساتھ مجموعی طور پر 20 کھلاڑیوں کو دیئے گئے ہیں۔
پاکستان کرکٹ بورڈ کے مطابق خواتین کرکٹرز کو آئندہ ایک برس کے لیے نئے سینٹرل کنٹریکٹ دے دیئے گئے ہیں، پہلی بار ابھرتی ہوئی نوجوان کھلاڑیوں کےلیے ایمرجنگ کیٹیگری بھی متعارف کروائی گئی ہے، آئی سی سی ٹی 20 رینکنگ کی نمبر ون باؤلر سعدیہ اقبال کو سینٹرل کنٹریکٹ کی اے کیٹیگری میں شامل کیا گیا ہے۔
مجموعی طور پر 20 کھلاڑیوں کو دیے جانے والے کنٹریکٹس میں 4 کھلاڑیوں کو اے کیٹیگری میں شامل کیا گیا، بی میں 3، سی میں ایک، ڈی میں 10 اور ایمرجنگ کیٹیگری میں 2 پلیئرز کو شامل کیا گیا ہے۔
کیٹیگری اے میں کپتان فاطمہ ثنا، منیبہ علی، سعدیہ اقبال اور سدرہ امین جگہ بنانے میں کامیاب ہوئیں ہیں، بی کیٹیگری میں آل راؤنڈر عالیہ ریاض، ڈیانا بیگ اور نشرا سندھو شامل ہیں۔
کیٹیگری سی کا کنٹریکٹ رمین شمیم کو ملا جب کہ ڈی کیٹیگری میں گل فیروزہ، نجیہ علوی، ناتالیہ پرویز، عمائمہ سہیل، صدف شمس، سدرہ نواز، عروب شاہ، طوبیٰ حسن، امِ ہانی اور وحیدہ اختر شامل ہیں۔
نوجوان کرکٹرز ایمان فاطمہ اور شوال ذوالفقار کو ایمرجنگ کیٹیگری میں موقع دیا گیا ہے۔