عمر ایوب نااہلی ریفرنس کی سماعت 12 اگست کو ہوگی
قومی اسمبلی میں سابق قائد حزب اختلاف اور پاکستان تحریک انصاف (پی ٹی آئی) کے رہنما عمر ایوب کی نااہلی ریفرنس کی سماعت 12 اگست کو ہوگی۔
ڈان نیوز کے مطابق الیکشن کمیشن آف پاکستان (ای سی پی) نے عمر ایوب نا اہلی ریفرنس کی سماعت کے لیے 12 اگست کی تاریخ مقرر کر دی۔
چیف الیکشن کمشنر کی سربراہی میں بینچ سماعت کرے گا، الیکشن کمیشن نے کاز لسٹ جاری کر دی۔
یاد رہے کہ 30 مئی کو قومی اسمبلی کے اسپیکر سردار ایاز صادق نے ایوان زیریں میں اپوزیشن لیڈر عمر ایوب خان کی نااہلی کا ریفرنس الیکشن کمیشن آف پاکستان (ای سی پی) کو بھجوایا تھا۔
یہ ریفرنس سابق ایم این اے بابر نواز کی جانب سے دائر درخواست پر مبنی ہے، جو 2024 کے عام انتخابات میں این اے 18 (ہری پور) سے عمر ایوب خان سے 82 ہزار ووٹوں کے فرق سے ہار گئے تھے۔
ای سی پی نے فوری طور پر ریفرنس کی پہلی سماعت 4 جون کو مقرر کردی تھی اور عمر ایوب اور بابر نواز دونوں کو نوٹسز جاری کر دیے گئے تھے۔