پاکستان پیٹرولیم لمیٹڈ کے آئی ٹی سسٹم پر سائبر حملے کا انکشاف
پاکستان پیٹرولیم لمیٹڈ (پی پی ایل) کے آئی ٹی انفرا اسٹرکچر کے کچھ سسٹمز پر سائبر حملے کا انکشاف ہوا ہے، پی پی ایل نے اس حوالے پاکستان اسٹاک ایکسچینج (پی ایس ایکس) کو مراسلہ لکھ کر آگاہ کر دیا۔
ڈان نیوز کے مطابق پاکستان پیٹرولیم لمیٹڈ نے پاکستان اسٹاک ایکسچینج کو لکھےگئے مراسلے میں بتایا کہ 6 اگست کو پی پی ایل کے آئی ٹی انفرا اسٹرکچر پر سائبر اٹیک ہوا، فوری طور پر سائبر سیکیورٹی پروٹوکول فعال کیا گیا، تاہم ادارے کے آئی ٹی انفرااسٹرکچر کےکچھ حصے رینسم ویئر کا نشانہ بنے ہیں۔
مراسلے میں مزید بتایا گیا کہ آئی ٹی اور سائبر سیکیورٹی ٹیموں نے بروقت اور مؤثر اقدامات کیے اور غیر اہم آئی ٹی سروسز احتیاطاً عارضی طور پر معطل کر دی گئیں ہیں۔
پاکستان اسٹاک ایکسچینج کو بھیجے گئے مراسلے میں بتایا گیا کہ پاکستان پیٹرولیم لمیٹڈ کی حساس یا اہم کاروباری ڈیٹا کے متاثر ہونےکے شواہد نہیں ملے۔