ایران ایئر کی افتتاحی پرواز کوئٹہ سے زاہدان کیلئے 75 مسافروں کو لیکر روانہ ہوگئی
ایرانی حکومت کی جانب سے شروع کی گئی ایران ایئر کی افتتاحی پرواز کوئٹہ سے زاہدان کے لیے روانہ ہوگئی۔
ڈان اخبار کی رپورٹ کے مطابق ایئربس اے-319 رات 9 بج کر 15 منٹ پر کوئٹہ انٹرنیشنل ایئرپورٹ پہنچی، اور 2 گھنٹے سے زائد قیام کے بعد رات 11 بج کر 30 منٹ پر ایران کے صوبہ سیستان-بلوچستان کے دارالحکومت زاہدان کے لیے 75 مسافروں کو لے کر روانہ ہوئی۔
ابتدائی طور پر ایران ایئر ہفتے میں ایک پرواز کوئٹہ اور زاہدان کے درمیان چلائے گی، جس کی تعداد مسافروں کی طلب کے مطابق بڑھائی جا سکتی ہے۔
اس موقع پر کوئٹہ ایئرپورٹ پر ایک تقریب کا انعقاد کیا گیا جس میں کوئٹہ میں ایرانی قونصلیٹ کے قونصل جنرل اور دیگر اہلکار، کاروباری برادری کے اراکین اور کوئٹہ چیمبر آف کامرس اینڈ انڈسٹری کے نمائندے شریک ہوئے۔
کوئٹہ ایئرپورٹ کے منیجر وحید شاہ، ٹرمینل منیجر اسمٰعیل کھوسو اور ایئرپورٹ سیکیورٹی فورس (اے ایس ایف) کے چیف سیکیورٹی افسر بھی مسافروں کو رخصت کرنے کے لیے موجود تھے۔
گزشتہ ماہ وزیر داخلہ محسن نقوی نے کہا تھا کہ سیکیورٹی خدشات کے باعث پاکستانی زائرین کو اربعین کے لیے ایران اور عراق سڑک کے ذریعے سفر کرنے کی اجازت نہیں دی جائے گی۔
اپنے سوشل میڈیا پیغام میں محسن نقوی نے کہا تھا کہ وزارتِ خارجہ، بلوچستان حکومت اور سیکیورٹی اداروں سے تفصیلی مشاورت کے بعد یہ فیصلہ کیا گیا ہے کہ اس سال اربعین کے لیے زائرین کو سڑک کے ذریعے عراق اور ایران جانے کی اجازت نہیں ہوگی۔