کرکٹر حیدر علی اور الزام عائد کرنے والی لڑکی کے درمیان جلد معاملات طے ہونے کا امکان
پاکستانی کرکٹر حیدر علی اور اُن پر زیادتی کا الزام لگانے والی لڑکی کے درمیان معاملات طے ہونےکا امکان ہے۔
ڈان نیوز کے مطابق ذرائع نے بتایا ہے کہ مانچسٹر پولیس کے زیر تفتیش کیس میں پاکستانی کرکٹرحیدر علی اور مبینہ طور پر زیادتی کا الزام عائد کرنے والی لڑکی کے درمیان معاملات باہمی رضا مندی سے حل ہوسکتے ہیں، تاہم کرکٹر حیدر علی کیس کے خاتمے تک برطانیہ چھوڑ کر نہیں جا سکتے۔
یاد رہے کہ پاکستان کرکٹ بورڈ (پی سی بی) نے 7 اگست کو مبینہ زیادتی کے الزام میں قومی کرکٹر حیدر علی کو عارضی طور پر معطل کر دیا تھا۔
ڈان نیوز کے مطابق قومی کرکٹر کو گریٹر مانچسٹر پولیس نے 4 اگست کو مبینہ زیادتی کے الزام میں گرفتار کرنے کے بعد ضمانت پر رہا کر دیا تھا۔
مانچسٹر پولیس نے 8 اگست کو اپنے ایک بیان میں بتایا تھا کہ 3 روز قبل زیادتی کی ایک رپورٹ موصول ہونے کے بعد ہم نے ایک 24 سالہ شخص کو گرفتار کیا، مبینہ طور پر یہ واقعہ بدھ، 23 جولائی 2025 کو مانچسٹر کے ایک مقام پر پیش آیا تھا۔