190 ملین پاؤنڈ کیس: ملک ریاض کے بیٹےعلی ریاض ملک کی 405 کنال اراضی کی نیلامی
وفاقی حکومت نے جائیداد کے کاروبار سے وابستہ معروف شخصیت ملک ریاض کے صاحبزادے اور 190 ملین پاؤنڈ کے القادر ٹرسٹ کیس کے مفرور ملزم علی ریاض ملک کی 405 کنال اراضی نیلام کر دی۔
سابق وزیراعظم عمران خان اور ان کی اہلیہ بشریٰ بی بی اسی کیس میں پہلے ہی قید کاٹ رہے ہیں۔
ڈان اخبار میں شائع رپورٹ کے مطابق نیلامی بھارہ کہو کے پٹوار آفس میں نیلامی کمیٹی کی نگرانی اور اسسٹنٹ کمشنر سیکریٹریٹ عزیر علی کی موجودگی میں ہوئی، موہڑہ نور میں واقع 405 کنال اور 3 مرلے کی زرعی اراضی 34 لاکھ 20 ہزار روپے فی کنال میں فروخت کی گئی۔
اس کے برعکس، کیس کی ایک اور مفرور ملزمہ فرحت شہزادی عرف فرح گوگی کی جائیداد میں سرمایہ کاروں نے کوئی دلچسپی ظاہر نہیں کی، یہ جائیداد بھی موہڑہ نور (بنی گالہ) میں واقع ہے اور فروخت نہ ہو سکی۔
اس سے قبل دن میں یہ افواہیں گردش کرنے لگیں کہ عمران خان کی بنی گالہ رہائش گاہ نیلام کی جا رہی ہے، پی ٹی آئی کے سیکریٹری جنرل سلمان اکرم راجا نے صبح 11 بجکر 50 منٹ پر ایک پوسٹ میں مبینہ نیلامی پر تشویش کا اظہار کیا اور کہا کہ اگر یہ خبر درست ہے تو یہ ایک خفیہ عمل تھا، انہوں نے درست معلومات حاصل کر کے شیئر کرنے کا وعدہ کیا۔
دوپہر 2 بجکر 15 منٹ پر سلمان اکرم راجا نے دوسری پوسٹ میں کہا کہ پی ٹی آئی کی قانونی ٹیم نے نیب ریفرنس 19/2023 (ریاست بنام عمران خان، القادر ٹرسٹ کیس) سے متعلق جو معلومات حاصل کی ہیں، ان کے مطابق نیلامی ان دیگر ملزمان کی جائیدادوں کی تھی جنہیں مفرور قرار دیا جا چکا ہے، انہوں نے مزید کہا کہ ہماری قانونی ٹیم اس معاملے پر نظر رکھے ہوئے ہے۔
علی ریاض ملک کی زمین خریدنے والے کامیاب بولی دہندہ کی شناخت اس خبر کے فائل ہونے تک معلوم نہ ہو سکی، کم از کم دو سرکاری حکام نے رابطہ کرنے پر کہا کہ وہ خریدار کے بارے میں لاعلم ہیں، ایک اہلکار کا کہنا تھا کہ ’مجھے نہیں معلوم کہ کامیاب بولی دہندہ کون ہے کیونکہ ٹرانسفر ڈیڈ ابھی مکمل نہیں ہوئی‘۔
حال ہی میں قومی احتساب بیورو (نیب) نے القادر ٹرسٹ کیس میں واجب الادا رقم کی وصولی کے لیے ملک ریاض اور بحریہ ٹاؤن سے منسلک 6 کمرشل جائیدادوں کی عوامی نیلامی بھی کی تھی۔
ان جائیدادوں میں 5 راولپنڈی اور ایک اسلام آباد میں واقع تھی، 6 میں سے 3 جائیدادیں کامیابی سے فروخت ہوئیں، روبیش مارکی 50 کروڑ 80 لاکھ روپے میں فروخت ہوئی جبکہ کارپوریٹ آفس l اور کارپوریٹ آفس II کے لیے بالترتیب 87 کروڑ 60 لاکھ اور 88 کروڑ 15 لاکھ روپے کی مشروط بولیاں لگیں۔