کراچی: سوئی سدرن کا 14 اگست کو 14 گھنٹے گیس کی بندش کا اعلان
سوئی سدرن گیس کمپنی (ایس ایس جی سی ) نے کراچی میں یوم آزادی کے موقع پر گیس کی بندش کا اعلان کردیا، جمعرات کی صبح 8 بجے سے رات 10 بجے تک گیس کی فراہمی معطل رہے گی
ڈان نیوز کے مطابق ترجمان ایس ایس جی سی نے کہا ہے کہ واٹربورڈ نے اپنی لائنوں کی بحالی میں تعاون کی درخواست کی ہے جس کے باعث سوئی سدرن کو اپنی مرکزی لائن ہارون آباد سائٹ ایریا منتقل کرنا ہوگی۔
ترجمان کے مطابق منتقلی کے کام کے دوران جمعرات 14اگست کو صبح 08 بجے سے رات 10بجے تک 14 گھنٹے کے لیے گیس کی فراہمی معطل رہے گی۔
ترجمان کے مطابق لائن کی منتقلی کے دوران شیر شاہ، سائٹ، جہان آباد،لاشاری محلہ، میٹروویل کےتمام بلاکس میں گیس بند رہےگی جبکہ پٹھان کالونی، پراناگولیمار، ریکسرکالونی، مسلم آباد اور اطراف میں بھی گیس بند رہے گی۔
ترجمان کا کہنا ہے کہ سائٹ انڈسٹریل ایریا، گلبائی، ماری پور اور منوڑہ کے علاقوں میں بھی 14 اگست کو سپلائی معطل رہےگی،اس دوران صارفین کودرپیش آنےوالی زحمت کے لیے ادارہ معذرت خواہ ہے۔
واضح رہے کہ 10 اگست کو کورنگی صنعتی ایریا میں واقع جام صادق پل کے قریب 24 انچ قطر کی مین گیس سپلائی لائن کی ری روٹنگ کا مکمل کرنے کیلئے اطراف کے علاقوں میں 24 گھنٹے کے لیے گیس کی فراہمی معطل کی گئی تھی۔