ریسکیو اور ریلیف کی سرگرمیاں جاری ہیں، نقصانات کا ازالہ کریں گے، علی امین گنڈاپور
وزیراعلیٰ خیبرپختونخوا نے مشکل کی اس گھڑی میں حکومت اپنے عوام کے ساتھ کھڑی ہے، انشاءاللہ ہم سب مل کر بہت جلد اس صورتحال پر قابو پا لیں گے، قدرتی آفات سے ہونے والے نقصانات کا ازالہ کریں گے۔
وزیر اعلیٰ خیبر پختونخوا علی امین خان گنڈا پور نے کلاؤڈ برسٹ کے نتیجے میں شدید بارشوں اور سیلاب سےہونے والی تباہی کے پیش نظر اپنے ویڈیو بیان میں کہا ہے کہ صوبے میں کلاؤڈ برسٹ اور بارشوں کی وجہ سے بھیانک قسم کے سیلابی ریلے آئے ہیں۔
انہوں نے کہا کہ مختلف حادثات سے بہت زیادہ جانی و مالی نقصانات ہوئے ہیں، لوگوں کو ریسکیو کرنے کے لیے صوبائی حکومت کے دو ہیلی کاپٹرز کام کر رہے تھے، ایک ہیلی کاپٹر خراب موسم کی وجہ سے افسوسناک حادثے کا شکار ہوئے جس میں پانچ افراد شہید ہوئے۔
وزیراعلیٰ خیبرپختونخو انے کہا کہ تمام متعلقہ محکمے اور ادارے ریسکیو اور ریلیف کی کارروائیوں میں مصروف ہیں، ہم لوگوں کے جان و مال کے تحفظ کے لیے تمام اقدامات یقینی بنا رہے ہیں۔
انہوں نے کہا کہ وزیر اعلیٰ ہاؤس میں کنٹرول روم کے ذریعے تمام صورتحال کی مانیٹرنگ کی جارہی ہے، اور متاثرہ اضلاع کے ساتھ ساتھ دیگراضلاع کی انتظامیہ کو بھی ہائی الرٹ کیا گیا ہے اور دیگر اضلاع میں بھی حفاظتی اقدامات اٹھائے جارہے ہیں۔
علی امین گنڈاپور نے کہا کہ متاثرہ علاقوں میں بند سڑکوں کو کھولنے کے لیے بھاری مشینری لگا دی گئی ہے، اور املاک کو پہنچنے والے نقصانات کے ازالے کے لیے بھی اقدامات کیے جا رہے ہیں۔
انہوں نے کہا کہ مشکل کی اس گھڑی میں صوبائی حکومت اپنی عوام کے ساتھ کھڑی ہے، اور صوبائی حکومت ان قدرتی آفات سے ہونے والے نقصانات کا مکمل ازالہ کرے گی۔
وزیراعلیٰ نے کہا کہ عوام سے اپیل ہے کہ احتیاطی تدابیر اپنائیں انتظامیہ کے ساتھ مکمل تعاون کریں، ہمارے منتخب عوامی نمائندے بھی اس وقت متاثرہ علاقوں میں موجود ہیں۔
انہوں نے کہا کہ منتخب نمائندے بھی مقامی انتظامیہ کے ساتھ کوآرڈینیشن رکھیں، انشاءاللہ ہم سب مل کر بہت جلد اس صورتحال پر قابو پا لیں گے۔