وزیراعظم کی چیئرمین این ڈی ایم اے کو خیبرپختونخوا میں امدادی کارروائیاں تیز کرنے کی ہدایت
وزیراعظم شہباز شریف نے چیئرمین نیشنل ڈیزاسٹر مینجمنٹ اتھارٹی (این ڈی ایم اے) کو خیبرپختونخوا کے 9 متاثرہ اضلاع میں امدادی کارروائیاں تیز کرنے کی ہدایت کر دی۔
ڈان نیوز کے مطابق سماجی رابطے کے پلیٹ فارم ’ایکس‘ پر وزیراعظم شہباز شریف نے کہا کہ خیبرپختونخوا اور شمالی پاکستان میں کلاؤڈ برسٹ (بادل پھٹنے) اور اچانک سیلاب کی وجہ سے ہونے والی تباہی سے شدید غمزدہ ہیں۔
انہوں نے کہا کہ دکھ کی اس گھڑی میں اپنے بھائیوں اور بہنوں کے ساتھ یکجہتی کے لیے کھڑے ہیں، حکومت ریسکیو اور ریلیف آپریشن کے لیے تمام وسائل کو متحرک کر رہی ہے۔
وزیراعظم نے کہا کہ چیئرمین این ڈی ایم اے سے ملاقات میں ہدایت کی ہے کہ سوات، بونیر، باجوڑ، تورغر، مانسہرہ، شانگلہ اور بٹ گرام کے متاثرہ اضلاع میں امدادی کارروائیوں کو تیز کیا جائے، باجوڑ اور بٹ گرام پر فوری توجہ دی جائے۔
انہوں نے کہا کہ پھنسے ہوئے رہائشیوں کو فوری ریلیف فراہم کیا جارہا ہے، زخمیوں کو طبی امداد فراہم کی جارہی ہے اور سڑکوں کو صاف کرنے اور رابطہ بحال کرنے کے لیے بھاری مشینری تعینات کردی گئی ہے۔
تباہی 2005 کے زلزلے جیسی ہے، امیر مقام
وفاقی وزیر امور کشمیر و گلگت بلتستان، سیفران امیر مقام نے کہا ہے کہ خیبرپختونخوا میں بارشوں اور سیلاب سے بڑی تباہی ہوئی، ضرورت اس بات کی ہے بحیثیت قوم متحد ہوکر متاثرین کی مدد کریں۔
انہوں نے کہا کہ خیبرپختونخوا میں بارشوں اور سیلاب سے حالیہ تباہی 2005 کے زلزلے اور 2010 کے سیلاب جیسی ہے۔
متاثرین کو معاوضہ ادا، سڑکیں بحال کی جائیں، علی امین گنڈاپور
وزیر اعلیٰ خیبر پختونخوا علی امین گنڈاپور آج سیلاب سے متاثرہ بونیر کا دورہ کریں گے، وزیراعلیٰ نے سول انتظامیہ کو حکم دیا ہے کہ متاثرین کو معاوضوں کی ادائیگی دو روز میں یقینی بنائی جائے، سب سے پہلے رابطہ سڑکوں کو بحال کرنے کے لیے اقدامات کیے جائیں۔
صوبے میں موجودہ ہنگامی صورتحال پر وزیر اعلیٰ علی امین گنڈاپور کی زیر صدارت اہم اجلاس ہوا جس میں چیف سیکریٹری، متعلقہ انتظامی سیکریٹریز، ڈویژنل کمشنرز اور صوبائی ڈیزاسٹر مینجمنٹ اتھارٹی (پی ڈی ایم اے) کے حکام نے شرکت کی۔
وزیراعلیٰ کو بریفنگ میں بتایا گیا کہ متاثرہ علاقوں میں ریسکیو آپریشن مکمل ہوگیا ہے، اب رابطہ سڑکوں کی بحالی پر کام جاری ہے، متاثرہ علاقوں میں میڈیکل ٹیمیں، ادویات اور اشیائے خورونوش سمیت ضروری سامان پہچایا جارہا ہے۔
بریفنگ میں آگاہ کیا گیا کہ متاثرین کو معاوضوں کی ادائیگی اور سڑکوں اور دیگر انفرااسٹرکچر کی بحالی کے لیے پی ڈی ایم اے اور محکمہ مواصلات کو ڈیڑھ، ڈیڑھ ارب روپے جاری کیے گئے، جاں بحق افراد کے لواحقین کو معاوضوں کے لیے 50 کروڑ روپے جاری کیے گئے ہیں۔
وزیراعلیٰ علی امین گنڈاپور نے اداروں اور ضلعی انتظامیہ کے بروقت رسپانس کو سراہا اور ہدایت کی کہ متاثرین کو معاوضوں کی ادائیگی اگلے 2 روز میں یقینی بنائی جائے، متاثرہ اضلاع میں خوراک پہنچانے کے لیے تمام وسائل استعمال میں لائے جائیں۔