سیلاب اور بارشوں سے تباہ کاریاں، یو این ڈی پی متاثرہ افراد کی مدد کیلئے کوشاں
قوام متحدہ کے ترقیاتی پروگرام (یو این ڈی پی) پاکستان نے کہا ہے کہ وہ ملک بھر میں آنے والے سیلاب کے بعد فوری انسانی ضروریات کو پورا کرنے کے ساتھ ساتھ طویل المدتی بحالی کے اقدامات کے لیے صورتحال کا جائزہ لے رہا ہے۔
اسلام آباد میں یو این ڈی پی کی انچارج افسر وان نیوگین نے جاری ایک بیان میں کہا کہہمارے دل ان خاندانوں کے ساتھ ہیں جنہوں نے اپنے پیاروں، گھروں اور روزگار کو کھو دیا ہے۔
انہوں نے کہا کہ جیسے جیسے پاکستان موسمیاتی تبدیلی کے باعث پیدا ہونے والی آفات کے بڑھتے ہوئے اثرات کا سامنا کر رہا ہے، یو این ڈی پی پاکستان کے عوام کے ساتھ اپنی یکجہتی، حکومت، شراکت داروں اور انسانی ہمدردی کی بنیاد پر کام کرنے والے اداروں کے ساتھ مل کر کمیونٹیز کو زیادہ مضبوط اور محفوظ کے عزم کا اعادہ کرتا ہے۔
بیان میں بتایا گیا کہ یو این ڈی پی نے خیبرپختونخوا کے شدید متاثرہ علاقوں میں ایمرجنسی امدادی سامان فراہم کیا، جس میں 180 خیمے، 103 اسٹریچر، 230 سلیپنگ بیگ، 130 فلڈ لائٹس اور 53 فرسٹ ایڈ کٹس سمیت دیگر ضروری سامان شامل ہے۔
صوبائی ڈیزاسٹر مینجمنٹ اتھارٹی (پی ڈی ایم اے) اور خیبرپختونخواہ پلاننگ اینڈ ڈویلپمنٹ ڈیپارٹمنٹ کے قریبی تعاون سے یہ امدادی سامان نوشہرہ بھیجا جا رہا ہے، جہاں پی ڈی ایم اے فوری ضروریات کی بنیاد پر انہیں متاثرہ کمیونٹیز میں تقسیم کرے گا۔
اعلامیے میں مزید کہا گیا کہ امدادی سرگرمیوں نے بے شمار زندگیاں بچائی ہیں لیکن کئی خاندانوں کو اب بھی فوری مدد چاہیے، بے گھر خاندانوں کو محفوظ پناہ گاہوں کی سخت ضرورت ہے جب کہ کیمپوں میں رہائش پذیر افراد کے لیے صحت کی سہولیات، صاف پانی اور صفائی ستھرائی کی مانگ میں اضافہ ہو رہا ہے۔
مسلسل بارشوں کی وجہ سے منقطع علاقوں تک رسائی ایک بڑا چیلنج بنی ہوئی ہے، جس سے امدادی کارکنوں کے لیے ضرورت مند افراد تک پہنچنا مزید مشکل ہو رہا ہے۔
مزید کہا گیا کہ اقوام متحدہ کا ترقیاتی پروگرام (یو این ڈی پی) پاکستان بھر میں حالیہ سیلاب کے باعث ہونے والے جانی نقصان اور بڑے پیمانے پر تباہی پر گہرے دکھ اور افسوس کا اظہار کرتا ہے۔
بھاری بارشوں اور اچانک آنے والے سیلاب نے سیکڑوں جانیں لے لیں، ہزاروں خاندان بے گھر ہو گئے اور بنیادی ڈھانچے تباہ ہو گئے ہیں، جس کے باعث کمیونٹیز کو فوری امداد کی سخت ضرورت ہے۔