کے-الیکٹرک حکام کی ممبر نیپرا کو آج رات تک تمام فیڈرز پر بجلی بحال کرنے کی یقین دہانی
کے-الیکٹرک حکام نے نیشنل الیکٹرک پاور ریگولیٹری اتھارٹی (نیپرا) کے ممبر رفیق احمد شیخ کو یقین دہائی کروائی ہے کہ آج رات ساڑھے 9 بجے تک باقی فیڈرز پر بھی بجلی بحالی کر دی جائے گی۔
واضح رہے کہ کراچی میں گزشتہ روز بارش کے دوران بجلی سے محروم ہونے والے متعدد علاقوں میں 24 گھنٹے سے زائد گزر جانے کے باوجود تاحال بجلی بحال نہیں ہوسکی جبکہ شہریوں نے کے الیکٹرک کے بجلی بحالی کے دعووں کو جھوٹا قرار دیتے ہوئے شدید غم و غصے کا اظہار کیا ہے۔
ڈان نیوز کے مطابق نیپرا کی جانب سے جاری اعلامیے میں بتایا گیا کہ ممبر نیپرا رفیق احمد شیخ نے کے-الیکٹرک سینٹرل کنٹرول روم کا دورہ کیا۔
اعلامیے کے مطابق ممبر نیپرا کو چیف ایگزیکٹیو افسر (سی ای او) کے-الیکٹرک اور کمپنی انتظامیہ نے موجودہ شدید بارشوں کے دوران بجلی سپلائی کی صورتحال پر بریفنگ دی، رفیق احمد شیخ نے کے-الیکٹرک ٹیموں، شہریوں واملاک کی الیکٹرکل سیفٹی کے حوالے سے خصوصی ہدایات جاری کیں۔
اعلامیے میں مزید بتایا گیا کہ نیپرا کے افسران کو بھی کے-الیکٹرک سینٹرل روم میں عوام کی سہولت کیلئے موجود رہنے کی ہدایت کی گئی ہے۔
اعلامیے کے مطابق کے-الیکٹرک حکام نے ممبر نیپرا کو آج رات 09:30 تک باقی ماندہ فیڈرز پر بھی بجلی بحالی کی بھی یقین دہانی کروائی ہے۔
رفیق احمد شیخ کی جانب سے موجودہ ایمرجنسی کی صورتحال میں کے-الیکٹرک کو تمام وسائل بروئے کار لانے کی بھی ہدایت کی گئی۔
نیپرا اعلامیے کے مطابق عوام کی جان و مال پر کسی قسم کا بھی سمجھوتہ نہیں کیا جائے گا۔