وفاقی وزیر داخلہ سے قائم مقام امریکی سفیر کی ملاقات، پاک-امریکا تعلقات پر تبادلہ خیال
وفاقی وزیرداخلہ محسن نقوی سے امریکا کی قائم مقام سفیر نیٹلی بیکر نے اہم ملاقات کی، جس میں پاک-امریکا تعلقات، انسداد دہشت گردی اور انسداد منشیات کے حوالے سے اشتراک کار پر تبادلہ خیال کیا گیا۔
سرکاری خبر رساں ادارے اے پی پی کی رپورٹ کے مطابق قائم مقام امریکی سفیر نیٹلی بیکر نے نشان امتیاز ملنے پر وفاقی وزیر داخلہ محسن نقوی کو مبارکباد دی اور وزیر داخلہ کے لیے نیک خواہشات کا اظہار کیا۔
قائم مقام امریکی سفیر نے پاکستان خصوصاً خیبرپختونخوا میں بارشوں و آبی ریلوں کے باعث جانی نقصان پر اظہار افسوس کیا، ان کا کہنا تھا کہ ہماری تمام تر ہمدردیاں جاں بحق افراد کے خاندانوں کے ساتھ ہیں۔
اس موقع پر وزیرداخلہ محسن نقوی نے پائیدار عالمی امن کیلئے مخلصانہ اقدامات پر امریکی صدر ڈونلڈ ٹرمپ کی غیر معمولی کاوشوں کو سراہا۔
ان کا کہنا تھا کہ پاک-بھارت سمیت 4 جنگیں رکوا کر امریکی صدر ڈونلڈ ٹرمپ نے انسانیت کی خدمت کی ہے، امید ہے کہ امریکی صدر ڈونلڈ ٹرمپ کی روس، یوکرین اور غزہ میں جنگ بندی کی کاوشیں بار آور ہوں گی۔
محسن نقوی نے کہا کہ امریکی صدر ڈونلڈ ٹرمپ کے دور میں پاک-امریکا تعلقات میں وسعت اور گرمجوشی آئی ہے، پاکستان امن کیلئے اٹھائے ہر قدم کا خیر مقدم کرتا ہے۔
قائم مقام امریکی سفیر کا کہنا تھا کہ پاکستان ہمارا اہم دوست ملک ہے، پاکستان کے ساتھ تعلقات کو خصوصی اہمیت دیتے ہیں۔