جنرل ساحر شمشاد مرزا سے بنگلہ دیشی فوج کے کوارٹر ماسٹر جنرل کی ملاقات، دفاعی تعاون بڑھانے کا عزم
چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے کوارٹر ماسٹر جنرل بنگلہ دیشی فوج لیفٹیننٹ جنرل محمد فیض الرحمٰن نے ملاقات کی، جس میں دفاع و سلامتی کے شعبے میں تعاون کو فروغ دینے کا عزم کیا گیا۔
انٹر سروسز پبلک ریلیشنز ( آئی ایس پی آر ) کے مطابق لیفٹیننٹ جنرل محمد فیض الرحمٰن نے جوائنٹ اسٹاف ہیڈ کوارٹرز راولپنڈی میں چیئرمین جوائنٹ چیفس آف اسٹاف کمیٹی (سی جے سی ایس سی) جنرل ساحر شمشاد مرزا سے ملاقات کی۔
ملاقات کے دوران دونوں فریقین نے خطے کی موجودہ سیکیورٹی صورتحال پر تبادلہ خیال کیا اور دفاع و سلامتی کے شعبے میں موجودہ تعاون کو بڑھانے کے مشترکہ عزم پر زور دیا۔
چیئرمین جوائنٹ چیفس آف اسٹاف کمیٹی نے دونوں ممالک کے درمیان دوطرفہ تعلقات کی بڑھتی ہوئی اہمیت کو اجاگر کیا اور دفاعی تعاون کے نئے ذرائع کی نشاندہی کی۔
لیفٹیننٹ جنرل محمد فیض الرحمٰن نے پاکستان کی مسلح افواج کی پیشہ ورانہ صلاحیتوں کو سراہا اور دہشت گردی کے خلاف جنگ میں ان کی قربانیوں کا اعتراف کیا۔