سرگودھا: گھریلو جھگڑے پر بیوی کی ٹانگ کاٹ کر فرار ہونیوالا شوہر مبینہ مقابلے کے بعد گرفتار
سرگودھا میں معمولی جھگڑے پر اپنی بیوی کی ٹانگ کاٹ کر فرار ہونے والے شوہر کو صدر پولیس کے ساتھ مبینہ مقابلے کے بعد گرفتار کر لیا گیا۔
ڈان اخبار کی رپورٹ کے مطابق پولیس نے بتایا کہ ملزم کی شناخت مظہر کے نام سے ہوئی ہے، جس نے گھریلو جھگڑے کے دوران اپنی بیوی 22 سالہ اقرا بی بی کو شدید زخمی کر دیا تھا۔
پولیس کے مطابق واقعے کی اطلاع ملتے ہی بھاری نفری کے ساتھ ملزم کی گرفتاری کے لیے سرچ آپریشن شروع کیا گیا۔
پولیس نے دعویٰ کیا کہ ملزم اپنے ساتھیوں کے ہمراہ سرگودھا کے علاقے چک 75 ساؤتھ کے قریب پولیس پارٹی پر فائرنگ کرتا رہا، سرچ آپریشن کے دوران اپنے ساتھیوں کی فائرنگ سے زخمی ہونے پر اُسے گرفتار کر لیا گیا۔
ملزم اور اُس کے مفرور ساتھیوں کے خلاف مقدمہ درج کر لیا گیا ہے۔