لاہور کے شہریوں کو آئندہ ہفتے کچرا اٹھانے کے بل بھیجے جائیں گے، ایل ڈبلیو ایم سی
پنجاب کے دارالحکومت کے شہریوں کو لاہور ویسٹ مینجمنٹ کمپنی (ایل ڈبلیو ایم سی) کی جانب سے آئندہ ہفتے سے کچرا اٹھانے کے بل بھیجے جائیں گے۔
ترجمان ایل ڈبلیو ایم سی کے مطابق ابتدائی طور پرپوش علاقوں اور کمرشل مارکیٹس سے فی مرلہ کے حساب سے بل وصول کیے جائیں گے، 9 ٹاؤنز میں مرحلہ وار سینی ٹیشن بل بھیجے جائیں گے، ریونیو اور آپریشنل فیلڈ سپروائزر کے ذریعے شہریوں کو بل بھیجیں جائیں گے۔
ایل ڈبلیو ایم سی کے ترجمان نے بتایا کہ سینی ٹیشن بلوں کی پرنٹنگ جاری ہے، آئندہ ہفتے سے شہریوں کو بل ملنا شروع ہوجائیں گے، شہری بینک اور آن لائن کیش ایپلی کیشنز سے بل ادا کر سکیں گے۔
لاہور میں 5 تا 40 مرلہ عمارتوں کو 300 سے 5000 روپے کا بل ملے گا، دیہات میں اس رقبے کی عمارت کا بل 200 سے 400 روپے ہو گا۔
ترجمان ایل ڈبلیو ایم سی کے مطابق سینی ٹیشن بل پنجاب کابینہ کی منظوری کے بعد نافذ کیے گئے ہیں۔
یاد رہے کہ رواں ماہ 7 اگست کو حکومت پنجاب نے صوبے بھر میں ماہانہ صفائی فیس عائد کرنے کا فیصلہ کیا تھا، رہائشی علاقوں میں فیس 200، جب کہ کمرشل علاقوں میں زیادہ سے زیادہ 5 ہزار روپے تک رکھنے کا عندیہ دیا گیا تھا۔
ترجمان محکمہ بلدیات پنجاب نے بتایا تھا کہ شہری اور دیہی علاقوں میں مختلف فیس ہوگی، رہائشی علاقوں میں فیس کم جب کہ کمرشل علاقوں میں فیس زیادہ ہوگی۔
محکمہ بلدیات پنجاب کے ترجمان نے بتایا کہ بلنگ کا سلسلہ ڈیجٹائز ہوگا مگر ابتدائی طور پر 2 ماہ کا بل پرنٹ کرکے دیا جائے گا۔
ترجمان نے بتایا تھا کہ شہری آن لائن ایپلی کیشن کے ذریعے فیس ادا کر سکیں گے۔